ჯეიკ პოლისა და ჯერვონტა დევისის საკრივო ბრძოლა, რომელიც 14 ნოემბერს უნდა გამართულიყო, გაუქმდა.
პოლი წლის ბოლომდე კრივის სხვა ღონისძიებაში იქნება მთავარი მონაწილე. ჯეიკმა სოციალურ ქსელში პოსტი გამოაქვეყნა.
"ჯერვონტა დევისი რეალურად მოსიარულე ნაგავია. მასთან მუშაობა აბსოლუტური კოშმარია - არაპროფესიონალიზმი, უცნაური მოთხოვნები, გადაღებებზე საათობით დაგვიანება. არაერთი დაპატიმრება, ბრალდებები და სასამართლო საქმეები. ვინც ამ ადამიანს მხარს უჭერს, მხარს უჭერს ყველაზე ბინძურ ცოდვას, რაც კაცს შეუძლია ჩაიდინოს.
არ მინდოდა ამ ქალთა მჩაგრელისთვის პლატფორმა მეჩუქებინა, გაეზარდა თავისი ფანბაზა და საბანკო ანგარიში. ჩემი კომპანია ქალების მხარდაჭერაზე დგას. ვიხდი ბოდიშს ყველას წინაშე, ვინც ჩართული იყო - განსაკუთრებით ქარდზე მყოფ მებრძოლებთან, ჩემს გუნდთან და იმ ადამიანებთან, ვინც ასე ბევრს შრომობდა ამ ბრძოლისთვის. მათ ოჯახთან და ბავშვებთან ყოფნის დრო დაკარგეს მხოლოდ იმისთვის, რომ ამ იდიოტს კიდევ ერთხელ დაეკარგა გონება. საშინელია, რომ ისეთი სატანური კაცები, როგორიც ის არის, კულტურისა და სპორტის მწვერვალზე ადიან და ძალაუფლების პოზიციებს იკავებენ.
იმედი მაქვს, მომავალში ადამიანები მის ყალბ ქუჩის ტანსაცმელსა და “სტილს” მიღმა გაიხედავენ და შეეცდებიან იპოვონ რაღაც უფრო ღირებული, რისი ფანობაც ღირს.
რაც შემეხება მე - როგორც ყოველთვის, შემდეგს ველოდები. ვინც, როცა და სადაც გინდა იყოს." - წერს პოლი.
ფრენსის ნგანუმ კი განაცხადა, რომ მან თავი შეურაცხყოფილად იგრძნო პოლის შეთავაზებით, ჩაენაცვლებინა ჯერვონტა დევისი.
„როგორ შეუძლიათ გადაინაცვლონ ჯერვონტა დევისიდან ფრენსის ნგანუზე? ამას აზრი არ აქვს. ისე დავიბენი, ვიფიქრე - არა, ძმაო, გთხოვ. ნუ მომექცევი ასე უპატივცემულოდ. ამით არ ვარ დაინტერესებული.“
