საქართველოს საკალათბურთო ნაკრების დებიუტანტმა, ალექს მერკვილაძემ, დანიასთან გამარჯვების შემდეგ, ჟურნალისტებთან კომენტარი გააკეთა.
"ასეთ მნიშვნელოვან მატჩებში, ასეთ მნიშვნელოვან წუთებში, ჩვენი ქვეყნის ეროვნული გუნდის მაისურით თამაში ჩემთვის დიდი სიხარული იყო. დიდი მადლობა სამწვრთნელო შტაბსა და თანაგუნდელებს იმისთვის, რომ ამის საშუალება მომეცა.
რაც შეეხება ჩაგდებულ ბურთებს, საქართველოს რიგებში თამაშისას ისეთი შეგრძნება გეუფლება, რომ ბურთის აცილება არ გინდა და 7-დან 7-ვე ბურთი კალათში ჩავიდა. იმედია, ასე გაგრძელდება", - აღნიშნა მერკვილაძემ.
ბელგიური ოსტენდეს მოთამაშემ დანიის ნაკრებთან ჩატარებულ ორივე მატჩში 12-12 ქულა მიითვალა. საქართველოს ნაკრებში მისთვის სადებიუტო ფანჯარა და მატჩები იყო.
ჩვენმა გუნდმა დანიელები 89:60 დაამარცხა. მარკის რიდმა 29 ქულა, 3 მოხსნა, 7 ასისტი მიითვალა, ხოლო შენგელიას აქტივში ორმაგი დუბლია - 27 ქულა, 11 მოხსნა, 3 ასისტი. რაც შეეხება ალექს მერკვილაძეს მას ორმაგ დუბლამდე 2 მოხსნა დააკლდა - 12 ქულა, 8 მოხსნა.
საქართველოს ნაკრებს საკვალიფიკაციოს ჯგუფში 4-დან 2 მოგება აქვს და ამ მომენტისთვის მე-2 ადგილზეა, რაც იმას ნიშნავს, რომ მე-2 საკვალიფიკაციო ეტაპზე გასვლა ოფიციალურად გაინაღდა და მსოფლიო ჩემპიონატის საგზურისთვის ბრძოლას აგრძელებს.
ალექსანდრ ჯიკიჩის გუნდი, ამავე ჯგუფის ეგიდით, 2 ივლისს უკრაინას ესტუმრება, ხოლო 5 ივლისს ესპანეთს უმასპინძლებს.
