ჯეიმს ჰარდენი შაბათს გამთენიისას დააკავეს და იარაღის უკანონო ტარების ბრალდება წაუყენეს, იტყობინება TMZ.
კალათბურთელი ტეხასში დააკავეს. სამართალდამცავი ორგანოების ინფორმაციით, ჰარდენის ავტომობილში ცეცხლსასროლი იარაღი აღმოაჩინეს.
გავრცელებული ცნობებით, იარაღი თვალსაჩინო ადგილას იდო და სპეციალურ ბუდეში არ იყო მოთავსებული. ბრალდება მსუბუქი კატეგორიის დანაშაულს მიეკუთვნება.
ჰარდენი გირაოს სანაცვლოდ გაათავისუფლეს, ხოლო სასამართლო სხდომა 22 ივნისს არის ჩანიშნული.
გირაოს პირობების მიხედვით, მას ეკრძალება ნებისმიერი ტიპის ცეცხლსასროლი იარაღის, საბრძოლო მასალისა და სხვა სახის იარაღის ფლობა.
ასევე, ექიმის დანიშნულების გარეშე არ აქვს უფლება გამოიყენოს, ფლობდეს ან მოიხმაროს ალკოჰოლი, კონტროლირებადი ნივთიერებები, საშიში მედიკამენტები ან მარიხუანა. გარდა ამისა, ჰარდენი ვალდებულია შემთხვევითი შარდის ანალიზები ჩაიტაროს.
ჰარდენი ამჟამად კლივლენდ კავალიერსის მოთამაშეა. მისი გუნდი გასულ თვეში აღმოსავლეთ კონფერენციის ფინალში ნიუ-იორკ ნიქსთან დამარცხდა და პლეი-ოფს გამოეთიშა.
ჰარდენი NBA-ში 2009 წლიდან ასპარეზობს, მას შემდეგ, რაც ოკლაჰომა სიტი თანდერმა იგი დრაფტის მე-3 ნომრად აირჩია.
კარიერის განმავლობაში მან ჰიუსტონ როკეტსში, ბრუკლინ ნეტსში, ფილადელფია სევენთისიქსერსსა და ლოს-ანჯელეს კლიპერსში ითამაშა, სანამ გასულ წელს კლივლენდ კავალიერსს შეუერთდებოდა.
