NBA-ს 2025 წლის ყველა ვარსკვლავის მატჩი - ახალი ფორმატი ცნობილია

ოფიციალურად გახდა ცნობილი, რომ NBA-ს 2025 წლის ყველა ვარსკვლავის მატჩი ახალი ფორმატით ჩატარდება.

ოლ-სტარზე მინი-ტურნირს ვიხილავთ ოთხი გუნდით და სამი თამაშით. 24 არჩეული მოთამაშე სამ 8-კაციან გუნდში განაწილდება, მეოთხე გუნდი კი ამომავალი ვარსკვლავებისგან იქნება შემდგარი.

გუნდების საპატიო მენეჯერები TNT-ის ანალიტიკოსები ჩარლზ ბარკლი, შაკილ ო'ნილი, კენი სმიტი და კენდეის პარკერი იქნებიან. ბარკლი, ო'ნილი და სმიტი თავიანთი გუნდებისთვის მოთამაშეებს დრაფტის წესით აირჩევენ, პარკერი კი ამომამავალი ვარსკვლავების გუნდის მენეჯერი იქნება.

2-2 გუნდი ერთმანეთს ნახევარფინალურ მატჩებში შეხვდებიან, მოგებული გუნდები კი ჩემპიონობისთვის იბრძოლებენ. თითოეული თამაშის გამარჯვებული ის გუნდი გახდება, რომელიც 40 ქულამდე პირველი ავა.

NBA-ს ყველა ვარსკვლავის მატჩისთვის მოთამაშეების ასარჩევი ხმის მიცემა 20 დეკემბერს დაიწყება.