მადრიდის რეალსა და უეფას შორის ომი დასრულდა — სუპერ ლიგის პროექტი ისტორიას ჩაბარდა.
მადრიდის რეალმა, ევროპულმა საფეხბურთო კლუბებმა (EFC) და უეფამ ხანგრძლივი მოლაპარაკებების შემდეგ მიაღწიეს შეთანხმებას, რომელიც ევროპული საკლუბო ფეხბურთის მომავალს განსაზღვრავს.
მხარეები შეთანხმდნენ ფუნდამენტურ პრინციპებზე, რომლებიც ეფუძნება სპორტულ დამსახურებას, კლუბების გრძელვადიან ფინანსურ მდგრადობას და თანამედროვე ტექნოლოგიების გამოყენებით გულშემატკივართა გამოცდილების გაუმჯობესებას.
ეს შეთანხმება საბოლოოდ დაასრულებს ყველა სამართლებრივ დავას, რომელიც ევროპის სუპერ ლიგის შექმნის მცდელობას მოჰყვა. როგორც კი პრინციპების იმპლემენტაცია დასრულდება, მხარეებს შორის არსებული იურიდიული კონფლიქტი ოფიციალურად შეწყდება." — წერია მადრიდის რეალის განცხადებაში.
სუპერ ლიგის პროექტი, რომელიც 2021 წელს დადასტურდა, იყო იდეა, რომელიც მადრიდის რეალის, ბარსელონას, იუვენტუსისა და სხვა გრანდების ინიციატივით შეიქმნა და მიზნად ისახავდა დახურული, ფინანსურად მაღალშემოსავლიანი ტურნირის ჩამოყალიბებას, რომელიც უეფას ჩემპიონთა ლიგის ალტერნატივა იქნებოდა.
თუმცა, საყოველთაო უკმაყოფილების გამო, პროექტიდან გასვლის შესახებ თითქმის ყველა კლუბმა მალევე გამოაცხადა. ბოლოს, პროექტში მხოლოდ რეალი და ბარსელონა დარჩნენ. ამ უკანასკნელმა სუპერ ლიგიდან გასვლა რამდენიმე დღის წინ დაადასტურა, დღეს კი რეალმა პროექტის საბოლოო დახურვაც ოფიციალურად გამოაცხადა.
