ოფიციალურად - კახა ჩხეტიანმა ეროვნული ლიგის აუტსაიდერი ჩაიბარა

ეროვნული ლიგის ბოლოადგილოსან მეშახტე ტყიბულს კახა ჩხეტიანი გაწვრთნის.

"კახაბერ ჩხეტიანის ხელმძღვანელობით, კლუბი ახალი გამოწვევებისთვის მზადებას შეუდგა. მისი თანაშემწეები თეიმურაზ ჯანაშია, თორნიჯე შეყრილაძე და გურამ ჯაფარიძე იქნებიან.

გვჯერა, რომ კახაბერის გამოცდილება, პროფესიონალიზმი და ხედვა მნიშვნელოვან როლს შეასრულებს გუნდის განვითარებასა და ეროვნული ლიგის ახალ სეზონში დასახული მიზნების მიღწევაში", - აღნიშნულია იმერული კლუბის ოფიციალურ განცხადებაში.

ეროვნული ლიგის 19 ტურის შედეგებით, მეშახტეს 11 ქულა აქვს, ბოლო ადგილზეა და დასარჩენ საპლეიოფო ზონას 11 ქულით ჩამორჩება, ხოლო პირდაპირ დასარჩენად 14-ქულიანი სხვაობით აღმოფხვრა სჭირდება.

48 წლის სპეციალისტი, ტყიბულელთა მთავარი მწვრთნელის პოსტზე, ლადო ბურდულს შეცვლის. თავის მხრივ, ბურდული, შესაძლოა, ეროვნული ლიგა 2-ის ლიდერ გარეჯი საგარეჯოს ჩაუდგეს სათავეში.

ჩხეტიანს სამწვრთნელო კარიერის მთავარი ნაწილი ტორპედო ქუთაისში აქვს გატარებული. მშობლიური ქალაქის გუნდს 5 წლის განმავლობაში წვრთნიდა და 6 ტიტული მოიპოვა, მათ შორის, საქართველოს ჩემპიონობა (2017-ში).