ნუნუ ეშპირიტუ სანტუ ვესტ ჰემის მთავარი მწვრთნელის პოსტზე რჩება და გუნდს პრემიერ ლიგაში პირველივე მცდელობით დაბრუნებისთვის ბრძოლაში გაუძღვება.
პორტუგალიელი სპეციალისტი ორშაბათს კლუბის უმაღლეს ხელმძღვანელობას შეხვდა. მიუხედავად იმისა, რომ პრემიერ ლიგიდან გავარდნის შემდეგ ორივე მხარეს შეეძლო კონტრაქტი ყოველგვარი კომპენსაციის გარეშე გაეწყვიტა, მათ მაინც თანამშრომლობის გაგრძელება გადაწყვიტეს.
კლუბს იმედი აქვს, რომ ნუნუ გაიმეორებს 2018 წლის წარმატებას, როდესაც მან ვულვზი ჩემპიონშიფიდან პრემიერ ლიგაში აიყვანა.
„მოხარულები ვართ დავადასტუროთ, რომ მან კლუბის მიმართ თავისი ერთგულება გამოხატა, ისევე, როგორც ჩვენ მის მიმართ,“ - ნათქვამია კლუბის ოფიციალურ წერილში, რომელიც გულშემატკივრებს მიეძღვნა, - „ნუნუმ მკაფიოდ აღნიშნა, რომ მას უდიდესი მოტივაცია აქვს, რათა ვესტ ჰემი უმაღლეს დივიზიონში დააბრუნოს. ეს მომავალი სეზონის უპირობო მიზანი უნდა იყოს. მას ჩემპიონშიფში მუშაობის მხოლოდ ერთწლიანი გამოცდილება აქვს და ეს იყო საოცარი წარმატება, როდესაც ვულვზთან ერთად 99 ქულით ჩემპიონი გახდა.“
კლუბის წყაროების შეფასებით, გავარდნა გუნდს დაკარგული შემოსავლების სახით დაახლოებით 200 მილიონი დაუჯდება. ეს ნიშნავს, რომ უზარმაზარი ფინანსური ზარალის ფონზე, წამყვანი ფეხბურთელების გაყიდვა გარდაუვალი იქნება. მათ შორისაა გუნდის კაპიტანი ჯაროდ ბოუენი და პორტუგალიელი ნახევარმცველი მატეუს ფერნანდესი.
სექტემბერში გრემ პოტერის გათავისუფლების შემდეგ, ნუნუს საკმაოდ მძიმე სტარტი ჰქონდა, თუმცა ხელმძღვანელობამ ბოლო თვეებში საკმარისი პროგრესი დაინახა იმისთვის, რომ პორტუგალიელს ენდოს:
„მიუხედავად იმისა, რომ კვირას დაფიქსირებული შედეგი ძალიან მტკივნეული იყო, დირექტორთა საბჭოს სჯერა, რომ ბოლო თვეებში გაუმჯობესების აშკარა ნიშნები გამოჩნდა. ბოლო 17 მატჩში აღებული 25 ქულა ნიშნავს, რომ ამ ტემპით გუნდი სეზონს მე-7 ადგილზე დაასრულებდა. იანვრის შემდეგ გუნდში მენტალიტეტის ამაღლება გვაფიქრებინებს, რომ ის სწორი ადამიანია ჩვენი წინსვლისთვის".
