ოქროს ბურთი მსოფლიო ჩემპიონატის გარეშე? რატომ იმსახურებს კეინი ჯილდოს

ალან შირერის აზრით, ჰარი კეინი ოქროს ბურთის მოგების მთავარი ფავორიტია, მიუხედავად იმისა, მოიგებს თუ არა ინგლისი მსოფლიო ჩემპიონატს.

ბაიერნის თავდამსხმელის მიერ ნაჩვენები შედეგები ამ სეზონში მართლაც შთამბეჭდავია – 47 მატჩში 54 გოლი და 7 საგოლე გადაცემა.

ბაიერნის ახალი MSN

შირერმა ბაიერნის მიმდინარე სეზონის შეტევა, კეინი, დიასი და ოლისე, ბარსელონას საკულტო MSN-ს (მესი, სუარესი, ნეიმარი) შეადარა. ამ სამეულმა მიმდინარე სეზონში უკვე 100 გოლს მოუყარა თავი.

ეს ტრიო მართლაც საოცარია. სტანდარტი, რომელსაც ისინი აჩვენებენ, ძალიან ჰგავს მესის, სუარესისა და ნეიმარის პერიოდს ბარსელონაში. რაც ყველაზე მეტად მაკვირვებს, ჰარი კეინი ყოველ მატჩში უფრო და უფრო უმჯობესებს თამაშს

რატომ არის კეინი ოქროს ბურთის კანდიდატი?

შირერის თქმით, კეინის თამაშის სტილი ბაიერნში სრულყოფილებამდეა მისული. მიუხედავად იმისა, რომ ის ხშირად იწევს უკან ბურთის მისაღებად, მის გარშემო არსებული მოთამაშეების სისწრაფე და ენერგია მას საუკეთესო პირობებს უქმნის.

ბაიერნი ამჟამად ჩემპიონთა ლიგის ნახევარფინალში პსჟ-სთან 4-5 აგებს, თუმცა გუნდის ფორმა და თავდამსხმელების ინდივიდუალური კლასი იძლევა იმედს, რომ სეზონის დასასრულს მიუნხენელები დიდ წარმატებას მიაღწევენ. წინ მსოფლიო ჩემპიონატია, სადაც კეინი ინგლისის ნაკრების ლიდერი იქნება და სწორედ იქ შეეცდება საკუთარი ამბიციების ოფიციალურად დადასტურებას.