ოქროს ბურთის 30 ნომინანტის ვინაობა უკვე ცნობილია, The Athletic-მა კი დაასახელა და შეაფასა 10 ფეხბურთელი, რომლებსაც მომავალ თვეში პრესტიჟული ჯილდოს მოგების ყველაზე დიდი შანსი აქვთ.
1. ჰარი კეინი
2. მაიკლ ოლისე
3. როდრი
4. კილიან მბაპე
5. ერლინგ ჰალანდი
6. ხვიჩა კვარაცხელია
7. ლამინ იამალი
8. ლუის დიასი
9. ჯუდ ბელინგემი
10. ლიონელ მესი
The Athletic ხვიჩა კვარაცხელიაზე წერს:
,,პსჟ-ის მიერ ზედიზედ მეორედ შესრულებული ლიგა 1-ისა და ჩემპიონთა ლიგის დუბლი უფრო მეტად გუნდური ძალისხმევის შედეგი იყო, ვიდრე რომელიმე კონკრეტული ფეხბურთელის ინდივიდუალური ბრწყინვალების.
თავისი როლი ტრავმებმაც ითამაშა, გარკვეულ მონაკვეთებში გუნდის დაცვა და ნახევარდაცვა ვარსკვლავებით დაკომპლექტებულ შეტევასაც კი სჯობდა.
მარკინიოსმა, ვილიან პაჩომ, ნუნუ მენდეშმა, ვიტინიამ და ჟოაუ ნევეშმა შესანიშნავი სეზონი ჩაატარეს, თუმცა მსოფლიო ჩემპიონატზე არასტაბილურმა ასპარეზობამ მათ შანსებზე უარყოფითად იმოქმედა.
ოქროს ბურთის მოქმედმა მფლობელმა უსმან დემბელემ მსოფლიო ჩემპიონატზე შესანიშნავად ითამაშა და 6 გოლი გაიტანა, თუმცა ტრავმების გამო ლიგა 1-სა და ჩემპიონთა ლიგაზე ჯამში 2 000 წუთზე ნაკლები ითამაშა.
ფაბიან რუისმა, რომელმაც ესპანეთთან ერთად მსოფლიო ჩემპიონატი მოიგო, მუხლის პრობლემის გამო ასევე ბევრი მატჩი გამოტოვა.
ყოველივე ამის ფონზე, საქართველოს ნაკრების მსოფლიო ჩემპიონატზე არყოფნა შესაძლოა ხვიჩა კვარაცხელიასთვის ოქროს ბურთისთვის ბრძოლაში ერთგვარი უპირატესობაც კი აღმოჩნდეს.
25 წლის ქართველი ხშირად როტაციის ნაწილი იყო და ლიგა 1-სა და ჩემპიონთა ლიგაზე ჯამში მხოლოდ 2 623 წუთი ითამაშა, თუმცა მაინც მოახერხა 18 გოლის გატანა და 10 საგოლე გადაცემის შესრულება.
ამ სიაში მყოფ სხვა ფეხბურთელებთან შედარებით ეს სტატისტიკა შესაძლოა განსაკუთრებით შთამბეჭდავად არ გამოიყურებოდეს, მაგრამ კვარაცხელია გადამწყვეტ მომენტებში ყოველთვის ახერხებდა თავის გამოჩენას.
ჩემპიონთა ლიგის მერვედფინალურ და მეოთხედფინალურ ეტაპებზე კვარაცხელიამ 4 გოლი გაიტანა და 2 საგოლე გადაცემა შეასრულა, ხოლო ბაიერნთან ნახევარფინალში 2-ჯერ გაიტანა და ერთხელ თანაგუნდელს გაატანინა.
არსენალთან ჩემპიონთა ლიგის ფინალში სწორედ მან მოიპოვა პენალტი, რომლის წყალობითაც პსჟ-მ ანგარიში გაათანაბრა.
მსოფლიო ჩემპიონატის წელიც რომ იყოს, ჩემპიონთა ლიგაზე კვარაცხელიას მიერ ნაჩვენები თამაში სათანადო შეფასების გარეშე ვერ დარჩება.
ოქროს ბურთის გამარჯვებული 26 ოქტომბერს ლონდონში გამოვლინდება.
,,ეს ჩემზე არაა დამოკიდებული" - კვარაცხელიას კომენტარი ოქროს ბურთზე
