ორი ვერცხლი დაკარიდან - ლუკა მახარაძე და ნურადინ მუსტაფაევი ვიცე-ჩემპიონები გახდნენ

სენეგალში მიმდინარე ახალგაზრდულ ოლიმპიურ თამაშებზე საქართველოს დელეგაციისთვის მეცხრე დღე განსაკუთრებით წარმატებული აღმოჩნდა.

ქვიშის ჭიდაობაში ქართველმა სპორტსმენებმა ორი ვერცხლის მედალი მოიპოვეს.

70 კილოგრამ წონით კატეგორიაში იასპარეზა ლუკა მახარაძემ, რომელმაც ჯგუფურ ეტაპზე სამივე შეხვედრა დამაჯერებლად მოიგო, ნახევარფინალში ირანელ ამირსალეჰ ჯავიდანიეგანეჰს სძლია, ფინალურ დაპირისპირებაში კი აზერბაიჯანელ ტუნარ გულიევთან დათმო შეხვედრა და ვიცე-ჩემპიონის ტიტულს დაეუფლა.

ანალოგიური შედეგი აჩვენა ნურადინ მუსტაფაევმა (90 კგ). მან ჯგუფური ეტაპი სამი გამარჯვებით გაიარა, ნახევარფინალში ბრაზილიელ ალან სმიტ ბესერა დე სოუზას გადაულახა ბარიერი, ხოლო ფინალში აზერბაიჯანელ ელგუნ კარიმლისთან დამარცხდა და ვერცხლის მედალს დაესაკუთრა.

შეგახსენებთ, რომ 7 ნოემბერს საქართველოს ოლიმპიურ გუნდს პირველი მედალი დავით მძევაშვილმა (60 კგ) მოუტანა, როდესაც ბრინჯაოს მედლისთვის ორთაბრძოლაში მასპინძელი სენეგალის წარმომადგენელი ბაბაკარ მბაიე დაამარცხა.