ესპანური AS პარი სენ-ჟერმენისა, საქართველოს ნაკრებისა და ხვიჩა კვარაცხელიას შესახებ სტატიას აქვეყნებს.
"ფიფას ვირუსმა ისევ განგაშის სიგნალი გამოიწვია პარი სენ-ჟერმენში - ერთ-ერთ იმ კლუბში, რომელიც ყველაზე მეტად დაზარალდა სეზონის პირველ სანაკრებო შესვენებაზე.
საქართველოს ნაკრების მთავარმა მწვრთნელმა, ვილი სანიოლმა ოქტომბრის ორი მატჩისთვის განაცხადი დაასახელა - პირველი შეხვედრა ესპანეთის წინააღმდეგ არის 11 ოქტომბერს, კვარაცხელია კი განაცხადში მოხვდა. ამ გარემოებამ პსჟ შეიძლება აიძულოს ჩაერიოს, რათა უზრუნველყოს, რომ მათი ტრავმირებული ფორვარდი პარიზში დარჩეს და რეაბილიტაცია გააგრძელოს.
სექტემბერში პარიზულმა კლუბმა საფრანგეთის ფეხბურთის ფედერაცია გააფრთხილა უსმან დემბელეს ფიზიკური მდგომარეობის შესახებ, რამაც კლუბსა და ფედერაციას შორის დაპირისპირება გამოიწვია. ოქროს ბურთის გამარჯვებულის უკრაინასთან მატჩში მიღებული ტრავმის შემდეგ, პსჟ-მ ოფიციალურ წერილში მიუთითა, რომ ფეხბურთელი სათამაშოდ მზად არ იყო, თუმცა დეშამმა და ფედერაციამ ეს წერილი უგულებელყვეს და ფეხბურთელს მოედანზე დრო მისცეს, რამაც მისი ბარძაყის ტრავმის გამწვავება გამოიწვია.
კვარაცხელიას შემთხვევაში სიტუაცია სხვაგვარია, თუმცა შესაძლოა პსჟ-მ საქართველოს ნაკრების სამედიცინო შტაბს ოფიციალურად მიმართოს. თავდამსხმელმა ტრავმა გასულ შაბათს ოსერის წინააღმდეგ მიიღო, შესვენების შემდეგ შეცვლა მოითხოვა და ბარსელონასთან მონჟუიკზე გასამართი მატჩისთვის განაცხადიდან ამოაგდეს. სხვადასხვა წყაროს ცნობით, ის ვერ დაეხმარება გუნდს კვირას ლილის წინააღმდეგაც, ხოლო სავარაუდო გამოჯანმრთელების ვადა დაახლოებით ათ დღედ განისაზღვრება.
ამ მიზეზით, პსჟ შეეცდება, რომ კვარა - გუნდის ერთ-ერთი უმთავრესი აქტივი და გასული სეზონის ჩემპიონთა ლიგის ტრიუმფის მთავარი ფიგურა – პარიზში დარჩეს და არ დააჩქაროს დაბრუნება. მიუხედავად იმისა, რომ საქართველოსთვის ეს ორი შეხვედრა - მათ შორის 11 ოქტომბრის მატჩი ესპანეთთან ელჩეში – მსოფლიოს ჩემპიონატის საკვალიფიკაციო ეტაპზე გადამწყვეტია, პარიზული კლუბის სამედიცინო შტაბი სხვა სცენარს არ განიხილავს, გარდა იმისა, რომ კვარაცხელიამ სრული რეაბილიტაცია საფრანგეთის დედაქალაქში უნდა გაიაროს." - წერია AS-ის სტატიაში.
