პერესი: "ნორმალური არაა, ბარსას საუკეთესო პერიოდი რომ ნეგრეირას წლებს ემთხვევა"

მადრიდის რეალის პრეზიდენტმა ფლორენტინო პერესმა ისაუბრა იმაზე, რომ ბარსელონას წარმატებული პერიოდი ზუსტად იმ დროს ემთხვევა, როცა კლუბი სამსაჯო კომიტეტის ყოფილ ხელმძღვანელთან თანამშრომლობდა.

2023 წელს ბარსელონას და მის ყოფილ ხელმძღვანელობას ბრალი კორუცფიაში წაუყენეს - კერძოდ, კლუბს 2001-2018 წლებში სამსაჯო კომიტეტის ვიცე-პრეზიდენტისთვის, ხოსე მარია ენრიკე ნეგრეირასთვის რამდენიმე მილიონი ევრო ჰქონდა გადახდილი. ოფიციალური ვერსიით, ნეგრეირა კლუბს ახალგაზრდა ფეხბურთელებზე აწვდიდა ინფორმაციას. 

ბოლო პერიოდში სასამართლოში დაიკითხნენ საქმის ფიგურანტები - მათ შორის ნეგრეირას შვილი ხავიერ ენრიკესი და ბარსას ყოფილი პრეზიდენტები სანდრო როსელი და ხოსეპ ბართომეუ.

„ესპანური მსაჯობის დონე მიუღებელია. სირცხვილია, რომ ფიფამ ახლახანს ჩატარებულ მსოფლიო საკლუბო ჩემპიონატზე არცერთი ესპანელი მსაჯი არ წაიყვანა.

რა თქმა უნდა, არც ისაა ნორმალური, რომ ბარსელონამ სამსაჯო კორპუსის ვიცე-პრეზიდენტს მინიმუმ 17 წლის განმავლობაში 8 მილიონი ევრო გადაუხადა. რა მიზეზითაც არ უნდა მომხდარიყო ეს გადახდები. 

საუბარია სამსაჯო კომიტეტის ვიცე-პრეზიდენტზე, რაც ძალიან მნიშვნელოვანი თანამდებობაა.

თანაც, ეს გადახდები ემთხვევა პერიოდს, როცა ბარსას ესპანეთში საუკეთესო შედეგები ჰქონდა." - აღნიშნა რეალის პრეზიდენტმა.