,,ფეთქებადი გამთამაშებელია" - სად გადავიდა რატი ანდრონიკაშვილი?

მორაბანკ ანდორამ გამთამაშებლის პოზიციის დროებით გასაძლიერებლად რატი ანდრონიკაშვილი დაიმატა.

,,25 წლის, 1.94 მეტრი სიმაღლის ქართველი კალათბურთელი გუნდს ორი თვის ვადით შეუერთდა და სავარჯიშო შემადგენლობის მოთამაშედ განიხილება.

ანდრონიკაშვილს საერთაშორისო გამოცდილება და ლიგა ენდესას ცოდნაც აქვს, ამ ჩემპიონატში მას უკვე უთამაშია მურსიასა და სარაგოსას შემადგენლობაში.

ქართველ გამთამაშებელს ასევე უთამაშია Primera FEB-ში, სადაც 2024/25 წლების სეზონში ობრადოიროს ღირსებას იცავდა. საქართველოს ეროვნული ნაკრების წევრი ბოლო სანაკრებო ფანჯრების დროს გუნდის ერთ-ერთი მნიშვნელოვანი მოთამაშე იყო.

ჟორდი არდევოლი აღნიშნავს, რომ ანდრონიკაშვილი გუნდს „სიმწიფის ეტაპზე უერთდება, მას შემდეგ, რაც საქართველოს ნაკრების შემადგენლობაში რამდენიმე ძალიან კარგი მატჩი ჩაატარა“.

სპორტული დირექტორი ახალ მოთამაშეს ასე ახასიათებს:

ის სწრაფი და ფეთქებადი გამთამაშებელია, კარგი ფიზიკური მონაცემებითა და დიდი შემოქმედებითი უნარებით, განსაკუთრებით შეტევების ორგანიზებისა და შედეგიანი გადაცემების მხრივ.

მისი დამატება გუნდს საშუალებას მისცემს, კიდევ ერთი გამთამაშებლის დახმარებით უკეთ გადაანაწილოს ამ პოზიციაზე მოთამაშე კალათბურთელების დატვირთვა და, ამავდროულად, თამაშში ახალი ალტერნატივაც მიიღოს.

„რამდენიმე მოთამაშის ფიზიკურმა მდგომარეობამ და სატრანსფერო ბაზარზე გაჩენილმა საინტერესო შესაძლებლობამ შესაძლებელი გახადა ეს ტრანსფერი, რომელიც თავდაპირველად დაგეგმილი არ გვქონდა“, - განმარტავს არდევოლი.

ამ ტრანსფერით რატი ანდრონიკაშვილი ჟან ტაბაკის განკარგულებაში გადადის და მომდევნო 2 თვის განმავლობაში გუნდის გამთამაშებლის პოზიციას გააძლიერებს." - წერია კლუბის განცხადებაში.