მსოფლიო ჩემპიონატის საკვალიფიკაციო ეტაპის მატჩში საქართველოს საკალათბურთო ნაკრები დანიას ესტუმრა.
შეხვედრა თანაბრად დაიწყო და პირველი მეოთხედი ფრედ 12-12 დასრულდა, მეორე მეოთხედში კი ქართველებმა გაქცევა მოახერხეს და შესვენებაზე 7-ქულიანი უპირატესობით გავიდნენ.
მესამე მეოთხედში ჯიკიჩის გუნდმა გადამწყვეტი უპირატესობა მოიპოვა და ბოლო მეოთხედი ფაქტობრივად ფორმალობად იქცა, საბოლოოდ კი მატჩი საქართველოს ნაკრების გამარჯვებით 71-89 დასრულდა.
გამარჯვებულ გუნდს კაპიტანმა თორნიკე შენგელიამ ულიდერა, რომელმაც 29 წუთში 24 ქულა, 8 მოხსნა და 5 შედეგიანი გადაცემა მიითვალა. გამორჩეული იყო დებიუტანტი ნატურალიზებული მარკის რიდის სტატისტიკაც, რომელმაც 27 წუთში 18 ქულა, 3 მოხსნა და 5 შედეგიანი გადაცემა ჩაიწერა აქტივში.
10 ქულაზე მეტი კიდევ ორმა მოთამაშემ დააგროვა, დუდა სანაძემ (13 ქულა) და ალექსანდრე მერკვილაძემ (12 ქულა). აღსანიშნავია, რომ ამ უკანასკნელმა 4-დან 4 სამქულიანი ჩააგდო.
საქართველოს ნაკრებმა ამ ჯგუფში პირველი გამარჯვება მოიპოვა და 3 მატჩის შემდეგ მე-3 ადგილზე იმყოფება. პირველ ადგილზე ესპანეთია 6 ქულით, მეორეზე კი უკრაინა - 5 ქულით. მომდევნო საკვალიფიკაციო ეტაპზე სწორედ 3 გუნდი გადის.
ჯიკიჩის გუნდი მომდევნო თამაშს ისევ დანიის ნაკრებთან ჩაატარებს, ამჯერად თბილისში. შეხვედრა 2 მარტს გაიმართება.
