ფოტო: ერთი ადგილი, ორი ავარია - ჰალის მოთამაშე ავტოავარიაში მოჰყვა

პრემიერ ლიგის ფეხბურთელი ჰალ სიტის საწვრთნელ ბაზასთან ავტოავარიაში მოჰყვა.

შემთხვევა მისი თანაგუნდელის მსგავს ინციდენტიდან რამდენიმე კვირის შემდეგ მოხდა.

შავი ფერის Mercedes, რომელიც BBC-ის ინფორმაციით, 24 წლის ნახევარმცველ ლუკას გურნა-დუატს ეკუთვნის, აღმოსავლეთ იორკშირში, კოტინგემში, ავარიაში მოყვა.

შემთხვევის ადგილიდან გავრცელებულ ფოტოებში ჩანს, რომ ავტომობილი გვერდზეა გადაბრუნებული. ერთ-ერთმა ადგილობრივმა მცხოვრებმა BBC-ს განუცხადა, რომ მანქანა მის ავტომობილსაც შეეჯახა და დააზიანა.

ჰალ სიტიმ განაცხადა:

„კლუბისთვის ცნობილია სოციალურ ქსელებში გავრცელებული ფოტოები, რომლებიც საწვრთნელ ბაზასთან ახლოს მომხდარ ავტოსაგზაო შემთხვევას ეხება და შეგვიძლია დავადასტუროთ, რომ ინციდენტის შედეგად არავინ დაშავებულა“.

ჰამბერსაიდის პოლიციის ცნობით, საგანგებო სამსახურებმა გამოძახება ადგილობრივი დროით 08:30 საათზე მიიღეს.

სექტემბერში გურნა-დუატის თანაგუნდელი სორბა თომასიც იმავე გზაზე მომხდარ ავტოავარიაში მოჰყვა.

პოლ ნიკერსონმა, რომელიც შემთხვევის ადგილთან ახლოს ცხოვრობს, განაცხადა:

„მანქანის გადაბრუნებიდან მალევე მივედი, რადგან ხმაური გავიგონე.

ეს ერთი წუთით ადრე რომ მომხდარიყო, ჩემი მეუღლე ჩვენს შვილებთან ერთად ამ გზაზე მიდიოდა და ისინი სკოლაში მიჰყავდა. ამიტომ ეს მართლაც ძალიან შემაშფოთებელია“.

ტრეისი ევანსის თქმით, რომელიც ამ გზაზე უკვე 19 წელია ცხოვრობს, დაახლოებით 10 წელია ითხოვს, რომ ამ მონაკვეთზე სიჩქარის დასაშვები ზღვარი შემცირდეს.

„ამ დროს ბავშვები სკოლაში მიდიან, მშობლები კი უკან ბრუნდებიან“, - განაცხადა მან.

ევანსმა ასევე აღნიშნა, რომ აუცილებელია შესაბამისი ზომების მიღება, რათა „მომავალში რაიმე უფრო სერიოზული შემთხვევა თავიდან ავიცილოთ“.