ფრანგი ლეგენდა მადრიდის რეალში გატარებულ პერიოდს იხსენებს: „ეს დაუვიწყარი მოგონებებია“.
ფრანგული ფეხბურთის ლეგენდას, ნიკოლა ანელკას, მადრიდის რეალში ხანმოკლე, თუმცა ტიტულოვანი კარიერა ჰქონდა. ყოფილი თავდამსხმელი სანტიაგო ბერნაბეუზე 1999 წელს არსენალიდან გადავიდა, სადაც მხოლოდ ერთი სეზონი დაჰყო, თუმცა ჩემპიონთა ლიგის მოგება მაინც მოასწრო.
გამოცემა SPORT-თან ინტერვიუში ანელკამ დიდი სითბოთი გაიხსენა ესპანეთში გატარებული დრო:
ჩემპიონთა ლიგის მოგება წარმოუდგენელი შეგრძნება იყო. მით უმეტეს, როცა რეალის ფორმით თამაშობ, ეს რაღაც განსაკუთრებულია. ეს მსოფლიოს ერთ-ერთი უდიდესი კლუბია და ესპანეთში გატარებული დროიდან მხოლოდ დაუვიწყარი მოგონებები დამრჩა.
მბაპე და ლამინ იამალი - ახალი ეპოქის დასაწყისი
ანელკამ ასევე შეაფასა თავისი თანამემამულის, კილიან მბაპეს თამაში რეალში და აღნიშნა, რომ ის ყველა მატჩში გოლის გატანას ახერხებს. მისი თქმით, კილიანს მხოლოდ ერთი რამ აკლია - ტიტული მადრიდულ გუნდთან ერთად, რასაც სეზონის ბოლოს აუცილებლად უნდა ველოდოთ.
ფრანგმა ფორვარდმა ბარსელონას ახალგაზრდა ვარსკვლავზე, ლამინ იამალზეც ისაუბრა და ის მბაპეს გვერდით დააყენა:
ლამინი ევროპისა და მსოფლიოს ერთ-ერთი უდიდესი ტალანტია. ვფიქრობ, ის და მბაპე დღეს საუკეთესოები არიან. ეს იქნება დიდი ბრძოლა საფრანგეთსა და ესპანეთს, ბარსელონასა და რეალს შორის, რაც კიდევ დიდხანს გაგრძელდება.
ანელკა დარწმუნებულია, რომ მადრიდის რეალი ამ სეზონში მინიმუმ ერთ დიდ ტიტულს, ლა ლიგას ან ჩემპიონთა ლიგას აუცილებლად მოიგებს.
