პორტუგალიის ჩემპიონატის 33-ე ტურში ლისაბონური დერბი, ბენფიკა - სპორტინგი გაიმართა.
აღნიშნულ შეხვედრას დამატებით მოტივაციას ის სძენდა, რომ სწორედ ეს ორი გუნდი იბრძვის ჩემპიონობისთვის. თამაშამდე ორივეს თანაბარი რაოდენობის ქულა (78) ჰქონდა დაგროვებული. პორტუგალიაში თანაბარ ქულებზე უპირატესობა ურთიერთშეხვედრების მიხედვით ენიჭება, პირველ წრეში კი სპორტინგმა 1:0 მოიგო, რაც იმას ნიშნავს, რომ დღეს გამარჯვების შემთხვევაში, ქოჩორას მომავალი გუნდი ოფიციალურად ჩემპიონი გახდებოდა.
საბოლოოდ, თამაში ფრედ 1:1 დასრულდა, რაც იმას ნიშნავს, რომ ჩემპიონის ბედი ბოლო, 34-ე ტურში გაირკვევა.
მე-4 წუთზე ტრინკაომ სპორტინგი დააწინაურა და პირველი ტაიმიც მოაგებინა, ანგარიში კი 63-ე წუთზე პავლიდისის დიდებული რეიდის შემდეგ აკტურკოღლუმ გაათანაბრა და ბენფიკას მატჩი გადაურჩინა. დარჩენილ დროში არწივები გამარჯვებასთანაც იყვნენ ახლოს, თუმცა სპორტინგის კარი ძელმა იხსნა.
საბოლოოდ, 33-ე ტურის შემდეგ გუნდებს კვლავ თანაბარი ქულები რჩებათ (79), თუმცა ურთიერთშეხვედრებში უპირატესობის გამო, ლიდერი სპორტინგია და ბოლო ტურში ორივე გუნდმა რომ მოიგოს, ჩემპიონი შარშანდელი სეზონის მსგავსად წელსაც ლომები გახდებიან.
ბოლო ტურში სპორტინგი საკუთარ მოედანზე მეხუთეადგილოსან ვიტორია გიმარაეშს დაუპირისპირდება, ბენფიკა კი მეოთხეადგილოსან ბრაგას ესტუმრება.
ჩემპიონობას პორტუგალიაში დამატებითი მნიშვნელობა ასევე იმიტომ აქვს, რომ მხოლოდ ჩემპიონი იღებს პირდაპირ საგზურს ჩემპიონთა ლიგაზე, მეორეადგილოსანს კი საკვალიფიკაციოს გავლა მოუწევს.
შეგახსენებთ, რომ ახალი სეზონიდან სპორტინგში საქართველოს ნაკრების ნახევარმცველი, გიორგი ქოჩორაშვილი ითამაშებს.
