პსჟ-ს პენალტების სერიის გმირმა ფინალურ მატჩში ხელი მოიტეხა

პარი სენ-ჟერმენის მეკარემ, მატვეი საფონოვმა, რომელმაც საკონტინენტთაშორისო თასის ფინალში ზედიზედ 4 პენალტი მოიგერია, ხელი მოიტეხა.

ფლამენგოსთან გამართული ფინალური მატჩი ფრედ 1:1 დასრულდა, პენალტების სერია კი პსჟ-მ საფონოვის ხარჯზე მოიგო, რომელმაც ზედიზედ 4 თერთმეტმეტრიანის აღება შეძლო.

პარიზული კლუბის ოფიციალური ვებ-გვერდი იტყობინება, რომ ფეხბურთელმა ფლამენგოსთან მატჩში ხელის ტრავმა მიიღო.

„მატვეი საფონოვმა ფლამენგოსთან მატჩში მარცხენა ხელი მოიტეხა. მისი მდგომარეობა განმეორებით 3-4 კვირაში შეფასდება." — აღნიშნულია კლუბის განცხადებაში.

პარი სენ-ჟერმენისთვის ეს 2025 წლის მე-6 ტიტული იყო: საფრანგეთის ჩემპიონატი, თასი, სუპერთასი, ევროპის სუპერთასი, ჩემპიონთა ლიგა და საკონტინენტთაშორისო თასი.