პსჟ ვალვერდეთი დაინტერესდა?

ესპანური გამოცემა El Chiringuito ავრცელებს ინფორმაციას, რომ პსჟ მადრიდის რეალის 27 წლის ნახევარმცველის, ფედე ვალვერდეს ტრანსფერით არის დაინტერესებული, თუმცა ფრანგულმა RMC Sport-მა ეს ყველაფერი მალევე უარყო.

ურუგვაელი მადრიდულ გრანდში საკვანძო მოთამაშეა, მაგრამ გასულ კვირას ვარჯიშზე თანაგუნდელ ორელიენ ჩუამენისთან მოუვიდა შელაპარაკება. მათ შორის ბაზაზე ორი ცალკეული დაპირისპირება დაფიქსირდა, რის გამოც ორივე ფეხბურთელი დააჯარიმეს. ამ ინციდენტის ფონზე კვლავ გაურკვეველია, დატოვებს თუ არა რომელიმე მათგანი ბლანკოსს ზაფხულის სატრანსფერო ფანჯრის დროს.

სწორედ ამ კონტექსტში გაჩნდა ვალვერდეს პსჟ-ში შესაძლო გადასვლის შესახებ ინფორმაციაც. მიუხედავად ამისა, RMC Sport-ის წყაროები იუწყებიან, რომ საფრანგეთის ჩემპიონებსა და ურუგვაელ ფეხბურთელს შორის არანაირი კონტაქტი არ შემდგარა.

პარიზელებისთვის ნახევარმცველის სატრანსფერო ფასი ზედმეტად მაღალია, ამასთანავე, მისი სათამაშო სტილი არ შეესაბამება მთავარი მწვრთნელის, ლუის ენრიკეს ტაქტიკურ ხედვებს.

პსჟ ზაფხულში ნახევარდაცვის ხაზის გაძლიერებას კი ნამდვილად გეგმავს.