ძიუდოში 23-წლამდელთა ევროპის ჩემპიონატზე საქართველოს ნაკრებისთვის გამორჩეული დღე იყო.
90 კგ წონით კატეგორიაში გულშემატკივარმა ქართული ფინალი იხილა, სადაც ერთმანეთს ლუკა ჯავახიშვილი და ნიკოლოზ დავლაძე დაუპირისპირდნენ.
დაძაბული შეხვედრა დამატებით დროში გადავიდა, სადაც ჯავახიშვილმა მეტოქის შიდოთი გაიმარჯვა და ოქროს მედალს დაეუფლა, დავლაძეს კი ვერცხლი ხვდა წილად. აღსანიშნავია, რომ ლუკა ჯავახიშვილის ეს გამარჯვება მიმდინარე კონტინენტის პირველობაზე საქართველოს ნაკრებისთვის პირველი ოქროს მედალია.
ტურნირზე წარმატებით იასპარეზეს სხვა ქართველმა ძიუდოისტებმაც. საქართველოს დელეგაციამ კიდევ სამი ბრინჯაოს მედალი მოიპოვა, რომლებიც ლუკა გადელიამ (60 კგ), მათე ბერუაშვილმა (73 კგ) და ნინო ლოლაძემ (57 კგ) დაისაკუთრეს.
