„ქართველების ერთი შეტევაც საკმარისი იქნებოდა", - როგორ შეაფასა ბელგიურმა მედიამ იბერიასთან გამარჯვება

სენტ-ტრუიდენმა ბელგიის ჩემპიონატში ზედიზედ სამი მარცხის შემდეგ გამარჯვება იზეიმა.

კონფერენს ლიგის საწყის შეხვედრაში ბელგიურმა კლუბმა იბერია 1999 საკუთარ მოედანზე 2:0 დაამარცხა.

როგორც Voetbalkrant წერს, მასპინძლებმა ინიციატივა პირველივე წუთებიდან აიღეს და ქართული გუნდი უკან დახიეს. ანგარიში მე-11 წუთზე რობერტ-იან ვანვესემალმა სამედ ბაჟდარის მომზადებული შეტევის შემდეგ გახსნა.

სენტ-ტრუიდენი უპირატესობას შესვენების შემდეგაც ფლობდა, თუმცა მეორე გოლის გატანას დიდხანს ვერ ახერხებდა.

„მეორე ტაიმშიც თამაში ძირითადად იბერიას ნახევარზე მიმდინარეობდა. სენტ-ტრუიდენი ბურთს უფრო ხშირად ფლობდა, მომენტებს ქმნიდა და დაცვაში მეტოქეს სივრცეს თითქმის არ უტოვებდა. მიუხედავად ამისა, ქართველების ერთი წარმატებული შეტევაც საკმარისი იქნებოდა, რომ მატჩში ყველაფერი თავიდან დაწყებულიყო“, - წერს გამოცემა.

შეხვედრის ბედი 88-ე წუთზე ილიას სებაუიმ გადაწყვიტა, რომელსაც საგოლე გადაცემა შეცვლაზე შესულმა ფრედერიკ სოელე სოელემ გაუკეთა.

Voetbalkrant გუნდებს შორის სხვაობის საჩვენებლად სტატისტიკასაც გამოყოფს: სენტ-ტრუიდენმა კარისკენ 20-ჯერ დაარტყა, იბერიამ კი ოთხჯერ. მასპინძელთა მეკარეს, ლეო კოკუბოს, მხოლოდ ერთი ზუსტი დარტყმის მოგერიება დასჭირდა.

გამოცემის შეფასებით, გამარჯვებამ ბელგიურ გუნდს საჭირო თავდაჯერება დაუბრუნა, თუმცა მომდევნო ტურში მიდტიულანდთან სტუმრად უფრო რთული გამოცდა ელის.