ლევანტესთან მატჩისწინა პრესკონფერენციაზე სევილიას ქართველმა ნახევარმცველმა, გიორგი ქოჩორაშვილმა ესპანური პრესის კითხვებს უპასუხა და ეროვნული ნაკრებიდან კლუბში დაბრუნებაზე ისაუბრა.
ფეხბურთელმა აღნიშნა:
ნაკრებში 4 თამაში მქონდა, რაც ყოველთვის რთულია, როცა სამ დღეში ერთხელ გიწევს თამაში, თუმცა უკვე აქ ვარ, დავბრუნდი სახლში. უკვე ვივარჯიშეთ და მთელი შემართებით მოვემზადებით მატჩისთვის... მზად ვარ მწვრთნელის ნებისმიერი დავალების შესასრულებლად. ვარჯიში 3-4 საათს გრძელდება, მაგრამ მე 24 საათის განმავლობაში ფეხბურთზე ვფიქრობ.
ის განსაკუთრებული ემოციებით ელოდება მატჩს ლევანტესთან, რადგან სწორედ ამ კლუბში დაიწყო მისი პროფესიული კარიერა, ხოლო ვისენტე იბორასთან საუბრის შემდეგ იცის, რომ მეტოქეს ძლიერი გუნდი ჰყავს და ადვილი თამაში არ იქნება.
კითხვაზე, თუ რას აკეთებს მაშინ, როდესაც საქმე კარგად არ მიდის, ნახევარმცველმა უპასუხა:
მნიშვნელოვანია, გარშემო ისეთი ადამიანები გყავდეს, რომლებიც ამ მომენტში დაგეხმარებიან. ჩემს პარტნიორს ყოველთვის ვესაუბრები, მაგრამ ასევე ვმუშაობ ფსიქოლოგთან და ანალიტიკოსთან გამოსავლის მოსაძებნად.
გარდა ამისა, მან ესპანელ მსაჯებზეც ისაუბრა და აღნიშნა:
ფეხბურთი მსაჯებს მნიშვნელოვანი როლი აქვთ, მაგრამ მათაც, ისევე როგორც ნებისმიერ ჩვენგანს, აქვთ კარგი და ცუდი დღეები. შეცდომებს ისინიც უშვებენ. ამაზე ყურადღების გამახვილება არ ღირს - მე საკუთარ თამაშზე ვარ კონცენტრირებული და ვერ ვისაუბრებ იმაზე, რაც ჩემზე არაა დამოკიდებული.
