ქოჩორაშვილი: "სამი თამაშია დარჩენილი და ჯერ არაფერია დაკარგული"

საქართველოს ეროვნული ნაკრების ნახევარმცველმა გიორგი ქოჩორაშვილმა ჩრდილოეთ ირლანდიასთან ერთა ლიგის წაგებული პირველი მატჩის (0:1) შემდეგ ვრცლად ისაუბრა.

მან აღნიშნა:

რა თქმა უნდა, წინ კიდევ სამი თამაში გველოდება და მესამე შეხვედრას ისევ ჩრდილოეთ ირლანდიის წინააღმდეგ გავმართავთ. შევეცდებით, მაქსიმალური შედეგი დავაფიქსიროთ. დღევანდელი მატჩიდან ის გამოცდილება უნდა მივიღოთ, რომელიც ჩვენთვის ძალიან მტკივნეულია. ყველაფერს ვიზამთ, რომ დარჩენილ შეხვედრებში მაქსიმუმი გავაკეთოთ. სამი თამაშია დარჩენილი და ჯერ არაფერია დაკარგული.

ქოჩორაშვილმა ასევე გაიხსენა სტადიონზე არსებული ემოციური ატმოსფერო და მოზარდ თაობას მიმართა:

სტადიონზე ძალიან ემოციური გარემო იყო. მოედანზე გასვლისას, მეც ის პატარა ბავშვი ვიყავი, რომელიც რამდენიმე წლის წინ ეროვნული ნაკრების თამაშებზე დადიოდა. ახლა კი თავად ვიდექი მოედანზე და ტრიბუნებიდან ბავშვები ჩვენ გვამხნევებდნენ. მინდა მათ ვუთხრა, რომ საკუთარი თავის ყოველთვის სჯეროდეთ.

საქართველოს ნაკრები ერთა ლიგის მომდევნო შეხვედრას 28 სექტემბერს, 20:00 საათზე, უკრაინის წინააღმდეგ გამართავს.