რეალის თავდამსხმელმა კილიან მბაპემ განმარტა, რატომ გადაწყვიტა ესპანეთის სუპერთასის ფინალში ბარსელონასთან თამაში (2:3), მიუხედავად მუხლის ტრავმის რეციდივის რისკისა.
მედიაში გავრცელდა ინფორმაცია, რომ ფრანგი მოედანზე შესვლას დათანხმდა, რათა რეალის მაშინდელი მთავარი მწვრთნელი, ჩაბი ალონსო, შესაძლო გათავისუფლებისგან ეხსნა. ესპანელ სპეციალისტს კატალონიელებთან მარცხის შემდეგ, მეორე დღესვე დაატოვებინეს პოსტი.
აღინიშნება, რომ ალონსოსა და მბაპეს ურთიერთობა თავიდანვე ძალიან კარგი იყო.
— საფრანგეთში წერდნენ, რომ სუპერთასზე თამაში საკუთარ თავს იმისთვის აიძულეთ, რომ ჩაბი ალონსო გადაგერჩინათ...
— „ყველაფერზე უნდა ვაკეთო კომენტარი, რასაც ფრანგი ჟურნალისტები წერენ? ბარსელონასთან მატჩისთვის საუდის არაბეთში იმიტომ ჩავედი, რომ ყოველთვის გუნდის დახმარება და ყველა შეხვედრაში მონაწილეობა მინდა. არ ვიცი, კარგად ვითამაშე თუ არა, მაგრამ ასეთი ვარ. ნებისმიერ თამაშში, თუ მოედანზე გასვლის შესაძლებლობა მაქვს, ამ შანსს ვიყენებ.
დაბრუნება თავიდანვე სუპერთასზე გვქონდა დაგეგმილი. ატლეტიკოსთან ეს ვერ გამოვიდა, რამაც გული ძალიან დამწყვიტა. ფინალისთვის ბოლომდე მზად არ ვიყავი, თუმცა მწვრთნელმა მთხოვა, რომ გუნდთან ერთად ვყოფილიყავი და ჩემი მხარდაჭერა გამეწია. ვცადე, რაც შეიძლება მეტი მეთამაშა.
საბოლოოდ, ყველაფერი კარგად ვერ დასრულდა, რადგან ვერ მოვიგეთ. ახლა კი მწყობრში დავბრუნდი და უნდა გავაკეთო ის, რაც გასაკეთებელია." — აღნიშნა მბაპემ მონაკოსთან დღევანდელი მატჩის წინა პრესკონფერენციაზე.
