ესპანური გამოცემა მარკას ინფორმაციით, პორტუგალიის ფეხბურთის ფედერაციის წარმომადგენლები მომავალ კვირას კრიშტიანუ რონალდუსთან შეხვედრას გეგმავენ.
მთავარი მიზანი ფეხბურთელსა და მთავარ მწვრთნელს, ხორხე ჟესუსს შორის ურთიერთობის დალაგება და კრიზისის მშვიდობიანად მოგვარებაა.
ფედერაციაში მიაჩნიათ, რომ რონალდუს, როგორც პორტუგალიური ფეხბურთის ლეგენდას, ეროვნულ ნაკრებში კარიერის ღირსეული დასრულება ეკუთვნის. სამშაბათს რონალდუს მიერ ნაკრების ბანაკის დატოვების შემდეგ, ფედერაციამ განცხადება გაავრცელა, სადაც მხოლოდ სპორტულ მოსამზადებელ პროცესზე გააკეთა აქცენტი და სკანდალზე ყურადღება არ გაუმახვილებია.
ბევრმა იფიქრა, რომ ფედერაცია ფეხბურთელზე გაბრაზებული იყო, განსაკუთრებით მას შემდეგ, რაც დანიასთან მატჩში რონალდუს შვიდიანი ნომერი რაფაელ ლეაოს გადასცეს. თუმცა სინამდვილეში მიზეზი ბევრად მარტივი აღმოჩნდა. წესების მიხედვით, სანაკრებო განაცხადში ფეხბურთელების ნომრები ერთიდან ოცდასამამდე უნდა იყოს გადანაწილებული, ამიტომ გუნდს სხვა გზა არ ჰქონდა.
პარალელურად კი პორტუგალიის ნაკრები მიმდინარე სანაკრებო პაუზის ბოლო მატჩისთვის ემზადება და კვირას ერთა ლიგის ჯგუფური ეტაპის მეოთხე ტურში ნორვეგიას დაუპირისპირდება.
