კრიშტიანუ რონალდუსა და პორტუგალიის ეროვნულ ნაკრებს შორის არსებულმა დაძაბულობამ უკვე პოლიტიკურ დონეზე გადაინაცვლა.
ადგილობრივი მედიის ცნობით, ქვეყნის პარლამენტმა ფეხბურთის ასოციაციას საგანგებო გზავნილით მიმართა და სიტუაციის სასწრაფოდ დარეგულირება მოსთხოვა.
კონფლიქტმა პიკს ოთხშაბათს მიაღწია, როდესაც მთავარ მწვრთნელთან, ჟორჟე ჟესუსთან დაპირისპირების შემდეგ, ვარსკვლავურმა თავდამსხმელმა ნაკრების ბანაკი საკუთარი კერძო თვითმფრინავით დატოვა. კრიშტიანუმ აღნიშნა, რომ სიმართლე მალე გაირკვევა. თავდაპირველად გაჩნდა ჭორები მისი სანაკრებო კარიერის დასრულების შესახებ, თუმცა ახლა ფეხბურთის ასოციაცია მხარეების შერიგებაზე აქტიურად მუშაობს და მომავალ კვირას სპეციალური შეხვედრაც იგეგმება.
საქმეში ქვეყნის პრემიერ-მინისტრი, ლუის მონტენეგროც ჩაერთო, რომელმაც დაპირისპირებულ მხარეებთან კონტაქტი უკვე დაამყარა. პოლიტიკოსების ასეთი აქტიურობა ლოგიკურია, რონალდუ ორ ათეულ წელზე მეტია პორტუგალიის მთავარი სახე და სიმბოლოა. მასთან საბოლოო განშორება არა მხოლოდ სპორტულ, არამედ ქვეყნის საერთაშორისო იმიჯზეც უარყოფითად იმოქმედებს.
ვითარებას განსაკუთრებით ართულებს 2030 წლის მსოფლიო ჩემპიონატი, რომელსაც პორტუგალია ესპანეთთან და მაროკოსთან ერთად მასპინძლობს. კრიშტიანუს ამ ტურნირის კომერციულ და სარეკლამო კამპანიაში უდიდესი როლი აქვს მინიჭებული.
მანამდე კი პორტუგალიის ნაკრები 4 ოქტომბერს ერთა ლიგის შეხვედრაში ნორვეგიას დაუპირისპირდება. ვნახოთ, როგორ აისახება ეს სკანდალი გუნდის მომავალ თამაშზე.
