საქართველოს 19-წლამდელთა ნაკრებმა სერბეთის ქალაქ ლოზნიცაში გამართული კრივის ევროპის ჩემპიონატი მედლების სრული კომპლექტით დაასრულა.
ჩვენს გუნდს ოქროს მედალი შალვა ბერიძემ (50 კგ.) მოუტანა - ფინალამდე 4 შეხვედრა მოიგო, სატიტულო ბრძოლაში კი ირლანდიელ კრისტიან ჯუბანის აჯობა და ევროპის ჩემპიონი გახდა.
"ჩავატარე 5 ორთაბრძოლა, ყველა მოვიგე და ევროპის ჩემპიონი გავხდი. მადლობა ჩემს მწვრთნელებს, მამას, ოჯახის წევრებსა და ყველა იმ ადამიანს, ვინც მხარს მიჭერდა. ასევე, მადლობა საქართველოს კრივის ეროვნულ ფედერაციას", - თქვა ევროპის ჩემპიონობის შემდეგ ბერიძემ.
70 კგ. წონით კატეგორიაში, აკაკი ბასარია ვერცხლის მედალს დაეუფლა, ხოლო დავით მხეცაძე (80 კგ.) ბრინჯაოს პრიზიორი გახდა. შესაბამისად, საქართველოს აქტივში თითო-თითო ოქროს, ვერცხლისა და ბრინჯაოს მედალია.
ფოტო: საქართველოს კრივის ეროვნული ფედერაცია
