ამ სეზონში ეს პირველი შემთხვევა არ არის - მოჰამედ სალაჰი მთელი მატჩის განმავლობაში სათადარიგო სკამზე დარჩა, სანამ მისი ლივერპული ოთხშაბათ ღამით მარცხდებოდა.
პარკ დე პრენსზე გამართულ მეოთხედფინალურ დაპირისპირებაში პსჟ-მ 2:0 გაიმარჯვა. გოლები დეზირე დუემ და ხვიჩა კვარაცხელიამ გაიტანეს.
წითლებს პარიზელების წინააღმდეგ სახიფათო მომენტების შექმნა ძალიან გაუჭირდათ. მათ მთელი მატჩის განმავლობაში კარში ერთი ზუსტი დარტყმაც კი არ ჰქონიათ. მიუხედავად ამისა, არნე სლოტმა არც კი სცადა ეგვიპტელი შემტევის გამოყენება უფანტაზიო შეტევის გასაცოცხლებლად.
სალაჰის წლევანდელი ცუდი ფორმის გათვალისწინებით, სლოტის გადაწყვეტილება შესაძლოა გამართლებულიც იყო, მაგრამ მაინც მოულოდნელი. ეს იყო პირველი შემთხვევა 2019 წლის ბარსელონასთან ცნობილი ნახევარფინალის შემდეგ, როცა 33 წლის ფეხბურთელმა ჩემპიონთა ლიგის მატჩი გამოტოვა (მაშინ მიზეზი ტვინის შერყევა იყო).
სალაჰს ჩემპიონთა ლიგის პლეი-ოფებში კარიერის განმავლობაში 13 გოლი აქვს გატანილი. ზაფხულში კლუბიდან მისი მოსალოდნელი წასვლის ფონზე, მას შესაძლოა მხოლოდ ერთი შანსი დარჩა ამ მაჩვენებლის გასაუმჯობესებლად. მომავალ კვირას, ენფილდზე გასამართი საპასუხო მატჩი შესაძლოა ბოლო იყოს, როცა ლივერპული გულშემატკივრები მას ამ ტურნირზე იხილავენ.
მაშ, რა იყო ასეთ მნიშვნელოვან შეხვედრაში მისი არყოფნის მიზეზი?
მატჩის შემდეგ სლოტმა მედიასთან არაერთხელ აღნიშნა, რომ მისი გუნდი გადარჩენის რეჟიმში იყო და, როგორც ჩანს, ამან იქონია გავლენა მის გადაწყვეტილებაზე. იმის ნაცვლად, რომ სალაჰი წაგებულ ბრძოლაში ჩაერთო, ნიდერლანდელმა მწვრთნელმა მისი ენერგიის დაზოგვა ამჯობინა ამ უქმეებზე ფულჰემთან შეხვედრისთვის და პსჟ-სთან საპასუხო მატჩისთვის.
„თამაშის ბოლო ნაწილში საუბარი უფრო გადარჩენაზე იყო, ვიდრე გოლის გატანის შანსზე,“ — განაცხადა სლოტმა საფინალო სასტვენის შემდეგ. „არასოდეს იცი, რა მოხდება, მაგრამ ბოლო 20-25 წუთი საკუთარ საჯარიმოში თავდაცვა გვიწევდა. ვფიქრობ, სჯობს მისი ენერგია მომდევნო კვირებისთვის დავზოგოთ.“
