ფრანგულმა სასამართლომ ფრანგული ფეხბურთის ისტორიაში ერთ ერთ ყველაზე ხანგრძლივ და ხმაურიან იურიდიულ დავას საბოლოო წერტილი დაუსვა.
მადრიდის რეალის ვარსკვლავის, კილიან მბაპეს სარჩელი პარი სენ ჟერმენის მენეჯმენტის წინააღმდეგ, რომელიც მორალურ შევიწროებას ეხებოდა, სასამართლომ არ დააკმაყოფილა.
ფრანგული გამოცემა ლეკიპის ცნობით, სასამართლომ საქმე მტკიცებულებების უკმარისობის გამო დახურა. მბაპე ყოფილ კლუბს ფსიქოლოგიურ ზეწოლასა და სამუშაო ადგილზე შევიწროებაში ადანაშაულებდა.
მბაპეს ადვოკატებმა ეს სარჩელი 61 მილიონი ევროს დავალიანებასთან დაკავშირებული პროცესის პარალელურად შეიტანეს, თუმცა მოგვიანებით ის უკანვე გამოიტანეს. პროკურატურამ გამოძიება დამოუკიდებლად გააგრძელა, მაგრამ მაისში მოსამართლეებმა საქმის წარმოება შეწყვიტეს, რადგან მოსარჩელე საქმეს მხარს თავად აღარ უჭერდა.
ამ საქმის ფესვები 2022 და 2023 წლების სეზონის დასაწყისიდან მოდის. პარი სენ ჟერმენის ხელმძღვანელობამ გადაწყვიტა მბაპე პირველი გუნდიდან მოეკვეთა და სხვა გარიყულ მოთამაშეებთან ერთად ევარჯიშებინა, რადგან მან კონტრაქტის გახანგრძლივებაზე უარი თქვა. მბაპე კლუბის მენეჯმენტს ადანაშაულებდა, რომ მათ მისი იძულება სურდათ ან კონტრაქტი გაეხანგრძლივებინა, ან სოლიდური თანხის სანაცვლოდ წასულიყო, რადგან მისი უფასოდ დაკარგვის ეშინოდათ.
ეს სიტუაცია კვირების განმავლობაში გრძელდებოდა. შემდეგ გუნდის მთავარი მწვრთნელი ლუის ენრიკე საქმეში ჩაერია და ფეხბურთელი ძირითად გუნდს დაუბრუნა. ამან მბაპეს სეზონის დასრულების და 2024 წლის ზაფხულში მადრიდის რეალში უფასოდ გადასვლის საშუალება მისცა.
პარი სენ ჟერმენმა თავის მხრივ ფეხბურთელს ხელფასის ნაწილი და ბონუსები დაუკავა. კლუბში მიიჩნევდნენ, რომ ეს პრეზიდენტ ნასერ ალ ხელაიფისთან დადებული სიტყვიერი შეთანხმების ნაწილი იყო პირველ გუნდში დაბრუნების სანაცვლოდ. ამან მბაპე აიძულა ფართომასშტაბიანი იურიდიული კამპანია დაეწყო.
ფეხბურთელმა შევიწროების შესახებ სარჩელის უკან გატანა მას შემდეგ გადაწყვიტა, რაც შრომითმა სასამართლომ გადაწყვეტილება მის სასარგებლოდ მიიღო და პარი სენ ჟერმენს დავალიანების სახით 61 მილიონი ევროს გადახდა დააკისრა.
ეს უკანასკნელი გადაწყვეტილება მხარეებს შორის ყველა იურიდიულ დავას ოფიციალურად ხურავს. ამით სრულდება ისტორია, რომელიც 2017 წელს დაიწყო, როდესაც მბაპე მონაკოდან პარიზში 180 მილიონ ევროდ გადავიდა, კლუბის ყველა დროის საუკეთესო ბომბარდირი გახდა და საფრანგეთის ჩემპიონატი შვიდჯერ მოიგო, სანამ კარიერის ახალ ეტაპს მადრიდის რეალის მაისურით დაიწყებდა.
