მადრიდის რეალის სპორტული დირექტორები უკვე ეძებენ მომავალ ალექსანდრ-არნოლდს, ალაბას, რუდიგერს ან მომდევნო კილიან მბაპესაც კი
ტრენტ ალექსანდ არნოლდი სულ ცოტა ხნის წინ ახლოდან გაეცნო მადრიდის რეალის სახლს და დაათვალიერა ჩემპიონთა ლიგის 15 თასი - ზუსტად ამდენივე თვის განმავლობაში მუშაობდა კლუბი ინგლისელის ტრანსფერზე, რომელიც რამოდენიმე კვირის წინ გახდა რეალობა. ტრანსფერების ეს ტაქტიკა მადრიდში ძალიან მოსწონთ და უკვე მუშაობენ იმ ფეხბურთელების სიაზე, რომლებმაც გუნდი 2026-27 წლების სეზონისთვის უნდა გააძლიერონ.
ტრენტის მსგავსად, რეალმა ალაბა და რუდიგერიც იგივე გზებით მოიყვანა - მცველები ყოფილ კლუბებთან კონტრაქტის ამოწურვას დაელოდნენ და მადრიდულ კლუბთან ხელშეკრულება თავისუფალი აგენტის სტატუსით გააფორმეს. მბაპესთან ერთად ჯამში ჩაბი ალონსოს რეალში ოთხი ასეთი ფეხბურთელი მოგვევლინება.
ეს დამთხვევა არ არის, ამ ფეხბურთელების ტრანსფერებზე მუშაობა რეალმა დიდი ხნით ადრე დაიწყო. რა თქმა უნდა, ასეთი მცდელობები ყოველთვის წარმატებით არ სრულდება - მაგალითად, წარუმატებელი იყო ალფონსო დეივსის შემთხვევა, რომელმაც ესპანურ კლუბთან მოლაპარაკებები თავისი მოქმედი გუნდისგან უკეთესი კონტრაქტის მისაღებად გამოიყენა და ბაიერნისგან ძალიან სარფიანი შემოთავაზება მიიღო, რომელმაც მიუნხენურ გიგანტს ფინანსური პრობლემებიც კი შეიძლება შეუქმნას.
გუნდებს მადრიდის რეალის ეშინიათ. მათ იციან რომ თუ კონტრაქტის დასასრულთან ახლოს მყოფი ფეხბურთელით რეალი დაინტერესდა, მხოლოდ ორი გამოსავალი რჩება - ან მოთამაშე თეთრებს შეუერთდება, ან მისი გუნდში დატოვება ძალიან ძვირი გამოდგება. ასეთი პრობლემა უდგას ლივერპულს იბრაჰიმა კონატესთან, ცენტრალური მცველის კონტრაქტი მალე იწურება და კონტრაქტის გახანგრძლივებაზე მან ლივერპულს უარი ერთხელ უკვე უთხრა.
ლივერპულის დირექტორები გრძნობენ, რომ ტრენტის სიტუაცია, რომელსაც რეალი სრულიად უფასოდ იმატებდა საკლუბო მსოფლიო ჩემპიონატი რომ არა, შესაძლოა მომდევნო ზაფხულშიც განმეორდეს. ასე მუშაობს ხუნი კალაფატის გუნდი, ძალიან ნელა, მოთმინებით და ეფექტურად.
კიდევ ბევრი ფეხბურთელია, რომელსაც კონტრაქტი მალე ეწურება. გამოუცდელი ახალგაზრდებიც და რაც მთავარია ვეტერანებიც, რომლებმაც კარგად იციან რომ მადრიდის რეალი დიდ ინვესტიციებს მხოლოდ ამომავალ ტალანტებში დებს, დანარჩენ ფეხბურთელებს კი შეუძლიათ კონტრაქტის ამოწურვას დაელოდონ და ასე დაუკავშირონ თავიანთი მომავალი მადრიდულ კლუბს
თუმცა, არიან ახალგაზრდა ფეხბურთელებიც - მაგალითად მოსკერა და მაილს ლუის-სკელი, რომელთა კონტრაქტებსაც რეალი აქტიურად აკვირდება. თუმცა, მომდევნო ზაფხულის მთავარ მიზნად ამ მომენტისთვის მადრიდელები კონატეს ისახავენ
