მადრიდის რეალი უეფასგან მიყენებული ზიანის ანაზღაურებისთვის 4.5 მილიარდ ევროს ითხოვს.
AS-ის ინფორმაციით, რეალის და სუპერლიგის კომპანიის იურისტები უკვე ამზადებენ სარჩელს, რომელსაც უეფას წინააღმდეგ სასამართლოში შეიტანენ მიღებული ზარალის ანაზღაურების მიზნით. თანხა, გავრცელებული ინფორმაციით, 4.5 მილიარდ ევრომდე აღწევს.
შეგახსენებთ, რომ 2024 წლის მაისში მადრიდის საარბიტრაჟო სასამართლომ ნაწილობრივ დააკმაყოფილა სუპერლიგის ორგანიზატორთა სარჩელი და დაადგინა, რომ უეფამ და ფიფამ უნდა შეწყვიტონ "ანტიკონკურენტული ქცევა" და არ დაუშვან მისი განმეორება მომავალში.
ორივე ამ ორგანიზაციას სასამართლომ დაავალდებულა, რომ დაუყოვნებლივ აღმოფხვრან ანტიკონკურენტული ქმედებების ყველა შედეგი.
2021 წლის აპრილში 12-მა ევროპულმა კლუბმა ახალი ტურნირის, სუპერლიგის შექმნის შესახებ გამოაცხადა. თუმცა, საყოველთაო პროტესტისა და უეფას და ფიფას მხრიდან წამოსული მუქარების ფონზე, პროექტი მალევე დატოვეს ჯერ ინგლისურმა და შემდეგ სხვა დიდმა კლუბებმაც. საქმე იქამდე მივიდა, რომ ახლა სუპერლიგის პროექტში დღემდე მხოლოდ ორი კლუბი - რეალი და ბარსელონა რჩებიან და ეს უკანასკნელიც გასვლას აპირებს.
მადრიდის რეალის აზრით, ფიფას და უეფას მხრიდან წამოსულმა პროექტის გაშავების კამპანიამ მათ დიდი მორალური ზიანი მიაყენა, რის კომპენსაციასაც ახლა სასამართლოს წესით ითხოვენ.
ზემოთხსენებული ესპანური გამოცემა ხაზს უსვამს, რომ რეალის მიერ მომზადებული სარჩელი უეფას წინააღმდეგ სრულ შესაბამისობაში მოდის ევროკავშირის მონოპოლიასთან დაკავშირებული დავების პოლიტიკასთან.
რამდენიმე თვის წინ, ევროპულმა კომისიამ ანალოგიურ საქმეზე "გუგლს" დააკისრა ჯარიმა 2.4 მილიარდი ევროს ოდენობით - სწორედ ეს შეიძლება გახდეს პრეცენდენტი, რომლის კვალდაკვალ წასვლასაც რეალი ეცდება.
