რევაზ მილდიანმა ევროპის ჩემპიონატზე სამი მედალი მოიპოვა!

რევაზ მილდიანი ევროპის ვიცე-ჩემპიონია!

ალბანეთის ქალაქ დურესში მიმდინარე ევროპის ახალგაზრდულ ჩემპიონატზე (U20, U23) ქართველმა ძალოსანმა რევაზ მილდიანმა (70 კგ) 20-წლამდელთა შორის წარმატებით იასპარეზა და ნაკრებს სამი მედალი მოუტანა.

ქართველმა სპორტსმენმა ატაცში 138 კილოგრამი დაძლია და ვერცხლის მედალს დაეუფლა, ხოლო აკვრაში 161 კილოგრამი ასწია და ბრინჯაოს პრიზიორი გახდა.

ორჭიდის ჯამში მოგროვილი 299 კილოგრამით მილდიანმა საპრიზო მეორე ადგილი დაიკავა და ევროპის ვიცე-ჩემპიონის ტიტული მოიპოვა.

ტურნირზე ასპარეზობას სხვა ქართველი ძალოსნებიც აგრძელებენ. 15 ოქტომბერს 23-წლამდელთა შორის 70 კილოგრამ წონით კატეგორიაში ფიცარნაგზე მანუჩარ ყიფშიძე გამოვა.