ჩელსი ადასტურებს, რომ დღეს ინგლისის ფეხბურთის ასოციაციამ (The FA) ოფიციალურად დაასრულა მიხაილო მუდრიკის ანტიდოპინგურ საქმეზე მიმდინარე პროცესი.
,,თავიდანვე ეს პერიოდი მიშასთვის როგორც პროფესიულად, ისე პირადად, უკიდურესად რთული იყო და გვიხარია, რომ საქმე საბოლოოდ დასრულდა ისე, რომ მას ფეხბურთში დაუყოვნებლივი დაბრუნების შესაძლებლობა მიეცა.
ამ პროცესის განმავლობაში მიშას მუდმივად ვუჭერდით მხარს, ამასთან ერთად სრულად ვცემდით პატივს ანტიდოპინგური სისტემისა და სამართლებრივი პროცესის მთლიანობას.
მივესალმებით იმ ფაქტის აღიარებას, რომ სამეცნიერო კვლევებისა და ტესტირების მეთოდების განვითარებამ უფრო სანდო ანალიზის ჩატარება შესაძლებელი გახადა. ეს ნიშნავს, რომ მიშას ნიმუში დღევანდელი ტექნიკური სტანდარტებით რომ ყოფილიყო შემოწმებული, დადებით შედეგად არ ჩაითვლებოდა და ანტიდოპინგური წესების დარღვევაც არ დაფიქსირდებოდა. ეს შეთანხმებული გადაწყვეტილების მნიშვნელოვანი კონტექსტია და ყველა ჩართულ მხარეს წინსვლის შესაძლებლობას აძლევს.
მიშა მთელი პროცესის განმავლობაში ამტკიცებდა, რომ აკრძალული ნივთიერება არასდროს მიუღია შეგნებულად ან განზრახ და არ იცოდა, როგორ აღმოჩნდა მისი კვალი მის ორგანიზმში. ამ ურთულესი პერიოდის განმავლობაში მან თავი პროფესიონალურად და გამძლეობით გამოიჩინა, მიუხედავად იმისა, რომ ეს მისი კარიერის ერთ-ერთი ყველაზე მძიმე ეტაპი იყო.
ვიცით, რამდენად ბევრს ნიშნავს მისთვის ფეხბურთში დაბრუნების ეს შესაძლებლობა. ახლა ჩვენი მთავარი მიზანია, დავეხმაროთ მიშას გუნდში სრულფასოვან ინტეგრაციაში და კარიერის განახლებაში.
ჩელსი კვლავაც სრულად ერთგულია სპორტული პატიოსნებისა და ყველა ანტიდოპინგური რეგულაციის უმაღლესი სტანდარტების დაცვის.
კლუბში ყველას სურს, დაეხმაროს მიშას სრულ ფიზიკურ ფორმაში დაბრუნებაში, გუნდთან ერთად ვარჯიშისა და მოედანზე დაბრუნების გზაზე." - წერია ლონდონური კლუბის განცხადებაში.
განცხადება თავად უკრაინელმა ფეხბურთელმაც გაავრცელა:
„ხანგრძლივი ბრძოლის შემდეგ, ოთხწლიანი დისკვალიფიკაცია, რომელიც ჩემთვის იყო დაწესებული, გაუქმდა და ახლა შემიძლია კარიერა დაუყოვნებლივ გავაგრძელო.
მადლიერი ვარ, რომ ეს პროცესი დასრულდა, ფეხბურთში დაბრუნების უფლება აღვიდგინე და ახლა უკვე შემიძლია მომავალზე ვიფიქრო.
ეს ჩემი კარიერის ყველაზე რთული პერიოდი იყო.
როგორც თავიდანვე ვამბობდი, არასდროს მიმიღია აკრძალული ნივთიერება შეგნებულად ან განზრახ. ჩემთვის ყოველთვის მნიშვნელოვანი იყო სამართლიან პირობებში ასპარეზობა და ჩემი კლუბისა და ქვეყნის ღირსეულად, პროფესიონალიზმითა და პატიოსნებით წარმომადგენლობა.
მსურს, მადლობა გადავუხადო ჩემს ოჯახსა და მეგობრებს მხარდაჭერისა და ნდობისთვის ამ მთელი პერიოდის განმავლობაში.
ასევე გულწრფელ მადლობას ვუხდი ჩელსის, ჩემს თანაგუნდელებსა და კლუბის გულშემატკივრებს, რომლებიც მთელი ამ დროის განმავლობაში ჩემს გვერდით იდგნენ.
მადლობას ვუხდი ჩემს იურიდიულ გუნდსა და ყველა იმ ადამიანს, ვინც დაუღალავად იმუშავა ჩემს საქმეზე.
ახლა ჩემი მთავარი მიზანია ფეხბურთში დაბრუნება, ყოველდღიური შრომა და მოედანზე გუნდისთვის პოზიტიური წვლილის შეტანა.
მადლობა ყველას, ვინც ჩემი რწმენა არ დაკარგა. მოუთმენლად ველი ჩემი კარიერის ახალ თავს.“ - წერს მუდრიკი.
მიხაილო მუდრიკი ჩელსის ჰონგ-კონგში შეუერთდება, სადაც ლონდონური გუნდი წინასასეზონო შეკრებას ატარებს.
