როდრიმ ტრავმაზე კომენტარი გააკეთა - გადაწყვეტილია, იქნება თუ არა საქართველოსთან

ესპანეთის ნაკრების ლიდერმა და ვიცე-კაპიტანმა, როდრიმ თავისი ტრავმის შესახებ პირველი კომენტარი გააკეთა.

"ეს პროცესის ნაწილია. კარგი ის არის, რომ მოედნიდან გამოვედი და კუნთს დაჭიმვის საშუალება არ მივეცი. ასევე კარგია, რომ შესვენება მაქვს, რაც გამოჯანმრთელების საშუალებას მაძლევს და იმედია, შემდეგ თამაშში მონაწილეობას მივიღებ", - აღნიშნა როდრიმ, რომელიც "შემდეგ თამაშში" პრემიერ ლიგის მომდევნო ტურს გულისხმობდა.

ასევე, პეპ გუარდიოლას თქმით, როდრის ეს დაზიანება არ ეხება მის მუხლის პრობლემას, რომლის გამოც თითქმის მთელი გასული სეზონი გაუცდა. 

აქედან გამომდინარე, გადაწყვეტილად შეგვიძლია ჩავთვალოთ, რომ ესპანეთის ნაკრებს საქართველოსა და ბულგარეთთან მატჩებისთვის, ლამინ იამალის შემდეგ, კიდევ ერთი ლიდერი გამოაკლდა.

როდრისა და იამალის გარდა, ფურია როხას ოქტომბრის მატჩებში ფაბიან რუისი, ნიკო უილიამსი, ფერმინ ლოპესი და დანი კარვახალი არ ეყოლება.

ესპანელები 11 ოქტომბერს, საქართველოს ნაკრებს ელჩეში უმასპინძლებენ, 14 რიცხვში კი ბულგარეთს ვალიადოლიდში დაუხვდებიან.