ოქტომბრის მატჩების წინ საქართველოს ნაკრების მთავარმა მწვრთნელმა, ვილი სანიოლმა პრესკონფერენციაზე სხვადასხვა საკითხზე ისაუბრა.
„რა თქმა უნდა, შემტევებისთვის მნიშვნელოვანია გოლების გატანა. თუმცა, ფეხბურთში მხოლოდ შეტევა არ არის მნიშვნელოვანი, არამედ დაცვაც. ჩვენ კი ბოლო დროს განსაკუთრებით დაცვაში გარკვეული გამოწვევები გვქონდა, სადაც თაობათა ცვლა მიმდინარეობს. ამიტომაც, ახლა ჩემი მოვალეობაა, სწორი ბალანსი ვიპოვო.
რა თქმა უნდა, რაც უფრო თავდაჯერებულია ფეხბურთელი, ეს უფრო გვეხმარება. კარგია, რომ მიქაუტაძე კარგ ფორმაშია, ვილიარეალმა მასში ძალიან დიდი თანხა გადაიხადა და ჩვენთვის კარგია, რომ ფორმაშია.
როდესაც ესპანეთსა და თურქეთთან გასვლაზე უნდა ითამაშო, საუბარი ძნელია, განსაკუთრებით ესპანეთზე, რომელიც მსოფლიოში საუკეთესო გუნდია. ჩვენი მიზანი კვლავ წინსვლა და განვითარებაა. თუ ამას შევძლებთ, შედეგებიც სასურველი იქნება.
დოლტმურზიევს რაც შეეხება, ყველა კანდიდატს ვაკვირდებით, ის ძალიან ნიჭიერია, მაგრამ ამ ეტაპზე ნაკრების წევრად არ განიხილება. გაგუას ივნისში დავაკვირდით და ვფიქრობთ, რომ ამ ეტაპზე არაა საკმარისი ის, რაც ვნახეთ. ნაკრებში თამაში დიდი პასუხისმგებლობაა და გარკვეული თვისებები საჭიროა. თავად მოთამაშეების პასუხისმგებლობაა, დაგვიმტკიცონ, რომ ნაკრებში თამაშს იმსახურებენ.
ჩემი პრიორიტეტი ყოველთვის იყო და იქნება ეროვნული გუნდის განვითარება, თუმცა ამავდროულად შედეგების მნიშვნელობასაც ვაცნობიერებ. ასეთი მაღალი დონის თამაშები მნიშვნელოვანია იმისთვის, რათა დავინახოთ, რა ეტაპზე ვართ. კონკრეტული შედეგი ბევრ ფაქტორზეა დამოკიდებული, მოგება ან წაგება მხოლოდ მწვრთნელის პასუხისმგებლობა არ არის. ჩემი მიზანია, რომ საქართველოს ნაკრებმა აჩვენოს, რომ მაღალი დონის გუნდია. ისაუბრონ ჩვენზე, როგორც რთულ მეტოქეზე.
კიტეიშვილზე არაერთხელ მისაუბრია და ყოველთვის აღვნიშნავთ მის მნიშვნელობას. გოლი, რომელიც გუშინ გაიტანა, მეტ თავდაჯერებას შესძენს. შემიძლია გითხრათ, რომ უფრო მშვიდად მძინავს, როცა ვიცი, რომ ის კარგად არის და სათამაშოდ მზადაა.
ჩაკვე რთულ სიტუაციაშია, მოგეხსენებათ, 7 თვეა არ უთამაშია. ვიმედოვნებთ, რომ მომავალ წელს, მარტის მატჩებისთვის მზად იქნება. ყველამ იცის, რომ ძალიან მნიშვნელოვანი მოთამაშე გვაკლია.
ფაქტია, რომ დაცვაში ბევრი პრობლემა და გამოწვევა გვაქვს. საზონოვი არ თამაშობს, ხვადაგიანს ტრავმა აქვს, ლოჩოშვილს - დისკვალიფიკაცია, ბევრი ფეხბურთელი ფორმაში არაა. ჩემთვის იდეალური მდგომარეობა არ არის, მაგრამ როგორც მწვრთნელმა, რეალობას თვალი უნდა გავუსწორო და უნდა ვეცადო იმ რესურსით მივაღწიოთ სასურველ შედეგს, რომელიც გვაქვს.
გოჩოლეიშვილისთვის დიდი გამოწვევაა ისეთ კლუბში თამაში, როგორიც ჰამბურგია, რომელსაც დიდი ტრადიცია აქვს. ბუნდესლიგა უმაღლესი დონის ჩემპიონატია და ახალგაზრდა მოთამაშეებისთვს მნიშვნელოვანია ამ დონის ჩემპიონატში ასპარეზობა“, - თქვა სანიოლმა.
საქართველოს ნაკრების შემადგენლობა ოქტომბრის მატჩებისთვის ცნობილია
