რომა ლიდერების გაშვებას აპირებს — კლაუდიო რანიერიმ ფინანსურ პრობლემებზე ისაუბრა

როგორც ჩანს, რომაულ კლუბში სერიოზული ცვლილებების დრო დგება.

კლაუდიო რანიერიმ Sky Sport Italia-სთან ინტერვიუში დაადასტურა, რომ კლუბს გადარჩენისთვის სახელფასო ფონდის შემცირება მოუწევს, რაც შესაძლოა პაულო დიბალასა და ლორენცო პელეგრინის წასვლით დასრულდეს.

„კლუბის გადარჩენისთვის საჭიროა სახელფასო ფონდის შემცირება, სხვაგვარად ვერ გავძლებთ. საქმე ის კი არ არის, რომ კლუბს დახარჯვა არ უნდა, უბრალოდ, ფინანსური ფეირ-პლეის გამო ხარჯები უნდა შევამციროთ“, — განმარტა რანიერიმ.

„გავითვალისწინებთ მათ ნაჩვენებ შედეგებს მოედანზე, მწვრთნელის აზრსა და თავად ფეხბურთელების მოთხოვნებს. თუ საერთო ენას გამოვნახავთ — შესანიშნავია. წინააღმდეგ შემთხვევაში, დამშვიდობება მოგვიწევს“.

კლაუდიო რანიერი, რომელმაც სამწვრთნელო კარიერა გასული სეზონის ბოლოს, სწორედ რომაში დაასრულა, ამჟამად კლუბის ხელმძღვანელობის მრჩევლის თანამდებობას იკავებს.