საქართველოს 19-წლამდელთა ოქროს ლიგის მოქმედი ჩემპიონი, დინამო თბილისი, დინამო მინსკთან ორრაუნდიან დაპირისპირებაში პენალტებით გამარჯვებით, UEFA Youth League-ის მეორე საკვალიფიკაციო ეტაპზე გავიდა.
ბელარუსებთან პირველი მატჩის 3:4 წაგების შემდეგ, ვასილ გეგუჩაძის შეგირდებმა საპასუხო შეხვედრა, ნიკა ადუაშვილის, გიორგი ლომიძისა და რატი ალექსიძის გოლებით, 3:0 წაიყვანეს, თუმცა ბელარუსებმა 2 გოლის გატანა და თამაშის პენალტების სერიამდე მიყვანა შეძლეს. თბილისელებმა თერთმეტმეტრიანების სერია 3:1-ით დახურეს.
საკვალიფიკაციო ეტაპის მე-2 რაუნდში დინამოელთა მეტოქე დანიის კოპენჰაგენია, რომელთანაც პირველი შეხვედრა თბილისში 28 ოქტომბერსაა, ხოლო საპასუხო - კოპენჰაგენში, 4 ნოემბერს.
წყვილში გამარჯვებული მე-3 საკვალიფიკაციო რაუნდში გავა და იტალიურ ფიორენტინასა და ბულგარულ სეპტემვრი სოფიას შორის მოგებულს დაუპირისპირდება.
ფოტო: დინამო თბილისი
ყველაფერი პენალტებით გადაწყდა - დინამოს დრამატული მატჩი Youth League-ზე
