საჩოგბურთო ოლიმპიური თამაშების წყვილთა თანრიგში რაფა ნადალის და კარლოს ალკარასის წყვილი წინსვლას აგრძელებს.
მეორე წრეში ვარსკვლავური ესპანური დუეტის მეტოქე ნიდერლანდელები, ტალონ გრიესკპორი და უესლი კულჰოფი იყვნენ და აშკარა ფავორიტს წყვილს დიდი ბრძოლაც გაუმართეს.
მატჩი 2 საათსა და 24 წუთს გაგრძელდა და ესპანელების გამარჯვებით, 6:4 6:7 (2:7), 10:2 დასრულდა. მოგეხსენებათ, წყვილთა თანრიგში მესამე სეტის ნაცვლად ჩოგბურთელები სუპერ ტაი-ბრეიკს თამაშობენ 10 ქულამდე.
ამ მოგებით ნადალმა და ალკარასმა პარიზის კორტებზე 1/4 ფინალური საგზური გაინაღდეს, სადაც მათი მეტოქეები ამერიკელი ოსტინ კრაიჩერი და რაჯეევ რამი იქნებიან, მატჩი ხვალ, 31 ივლისს შედგება.
