უეინ რუნიმ ტრენტ ალექსანდერ-არნოლდის ინგლისის ნაკრებიდან ამოგდებას გაუგებარი უწოდა, მიუხედავად იმისა, რომ მანჩესტერ იუნაიტედის ყოფილი კაპიტანი მსოფლიო ჩემპიონატზე ძირითად შემადგენლობაში მაინც რის ჯეიმსს დააყენებდა.
ალექსანდერ-არნოლდი მოულოდნელად ნაკრებს მიღმა დარჩა მარტის მატჩებისთვის ურუგვაისა და იაპონიის წინააღმდეგ, მიუხედავად იმისა, რომ ის რეალ მადრიდის სასტარტო შემადგენლობის წევრია. თომას ტუხელმა გუნდში ბენ უაითი დააბრუნა, რომელმაც ორივე ამხანაგურ შეხვედრაში ითამაშა და ურუგვაის გოლიც გაუტანა.
მომხდარზე რუნიმ განაცხადა:
ბენ უაითს პატივს ვცემ, ის მართლაც კარგი მოთამაშეა, მაგრამ ის ფაქტი, რომ ის გუნდშია და ტრენტზე წინ დგას, ჩემთვის წარმოუდგენელია.
საინტერესოა, რომ ალექსანდერ-არნოლდს ინგლისის ნაკრებში 11 თვეა არ უთამაშია. გასულ ზაფხულს ლივერპულიდან რეალ მადრიდში გადასვლის შემდეგ, მას თავიდან ადაპტაციის პერიოდი ჰქონდა, თუმცა იანვრიდან მოყოლებული ის ესპანური გრანდის შეუცვლელი ფიგურაა. მიუხედავად ამისა, ტუხელმა ჯერ კიდევ ნოემბერში აღნიშნა, რომ ჯარელ კვანსა და ტინო ლივრამენტო მისთვის პრიორიტეტული ვარიანტებია.
რუნი მიიჩნევს, რომ მიუხედავად ტრავმიანობისა, რის ჯეიმსი საუკეთესო კანდიდატია მარჯვენა მცველის პოზიციაზე, რადგან მას დაცვაში თამაში უკეთ ეხერხება:
ჩვენ არ გვჭირდება, რომ ჩვენი მცველები ზედმეტად შემტევები იყვნენ. ჩვენ გვჭირდება, რომ მათ დაცვა იცოდნენ. შეტევაში საკმარისი ნიჭი გვაქვს, რომ თამაშები მოვიგოთ.
მისი აზრით, ინგლისის დაცვის ოთხეული მსოფლიო ჩემპიონატზე ასე უნდა გამოიყურებოდეს: რის ჯეიმსი, ჰარი მაგუაირი, მარკ გეჰი და ლუკ შოუ.
