რუსთავმა გორში მოიგო - რა მდგომარეობაა ეროვნულ ლიგაში

ეროვნული ლიგის 1-ელი ტურის გადადებული 3 მატჩის ჩატარების შემდეგ, სატურნირო ცხრილმა საბოლოო სახე მიიღო.

დინამო არენამ დინამო თბილისისა და დინამო ბათუმის მატჩს უმასპინძლა - აჭარლები ორჯერ იგებდნენ, თუმცა დედაქალაქელებმა გათანაბრება შეძლეს და გუნდებმა 1-1 ქულა მოიპოვეს. აღსანიშნავია, რომ ეროვნულ ლიგაში სადებიუტო გოლი შეაგდო 19-წლამდელთა ნაკრების ფორვარდმა, 18 წლის ჰალიდ დოლტმურზიევმა.

ასევე 2:2 ითამაშეს მოქმედმა ჩემპიონმა, იბერია 1999-მა და ტყიბულის მეშახტემ - ჯინჯოლავასა და ძაგანიას გოლებით, იბერიელები 2:0 დაწინაურდნენ, რასაც ჯერ მათმა ყოფილმა თავდამსხმელმა, ირაკლი სიხარულიძემ, მსაჯის მიერ კომპენსირებულ დროში კი ერიკ პიმენტელმა უპასუხა.

შესანიშნავ ფორმას ინარჩუნებს გია ცეცაძის რუსთავი, რომელმაც მოქმედ ვიცე-ჩემპიონსა და თასის გამარჯვებულ დილას სტუმრად მოუგო. სოლომონ კესიმ და ვაჟა ფაცაციამ რუსთაველები 2:0 გაიყვანეს წინ, რასაც შიდა ქართლელთაგან მხოლოდ ტრეი ფულერის გოლი მოჰყვა.

1. იბერია 1999 (თბილისი) - 11 ქულა;

2. სპაერი (თბილისი) - 10 ქულა;

3. რუსთავი (რუსთავი) - 10 ქულა;

4. სამგურალი (წყალტუბო) - 8 ქულა;

5. ტორპედო (ქუთაისი) - 7 ქულა;

6. დინამო (ბათუმი) - 7 ქულა;

7. დინამო (თბილისი) - 7 ქულა;

8. დილა (გორი) - 7 ქულა;

9. მეშახტე (ტყიბული) - 7 ქულა;

10. გაგრა (თბილისი) - 5 ქულა.

ბომბარდირთა დავას, 4 გოლით, რუსთავის ფორვარდი ჟანი ლიდერობს, 3 გოლი აქვს სპაერის მარცხენა მცველ გიგა სამხარაძეს - 3-ვე პენალტით.

მომდევნო, მე-7 ტურის, მატჩები 17-18 აპრილს გაიმართება, მათგან ორი შეხვედრაა გამოსარჩევი - ბათუმში, აჭარაბეთ არენაზე, დინამო ბათუმი იბერია 1999-ს უმასპინძლებს, ხოლო მეორე-მესამე ადგილზე მყოფი სპაერი და რუსთავი მიხეილ მესხი 2-ზე შეხვდებიან.

ფოტო: სკ რუსთავი