„სანამ არ წავა, ოქროს ბურთი სულ მას უნდა მივცეთ“ - რომერო

მადრიდის ატლეტიკოსა და არგენტინის ნაკრების მცველმა, კრისტიან რომერომ ოქროს ბურთის დაჯილდოებასთან დაკავშირებით ხმაურიანი განცხადება გააკეთა.

მან მხარი ლეო მესის დაუჭირა და აღნიშნა, რომ თანამედროვე ფეხბურთში ინდივიდუალური ჯილდოების ბედს ხშირად სპორტული მიღწევების ნაცვლად, მარკეტინგი წყვეტს.

მადრიდულ დერბიში რეალთან მოპოვებული გამარჯვების (2:1) შემდეგ, ESPN-თან საუბრისას 28 წლის მცველმა საკუთარი პოზიცია მკაფიოდ დააფიქსირა:

ოქროს ბურთი ლეო მესის უნდა გადაეცეს. სანამ ის კარიერას არ დაასრულებს, ეს საკითხი განხილვას უბრალოდ არ ექვემდებარება

რომერომ ლეოს პიროვნულ თვისებებზეც ისაუბრა და გაიხსენა, როგორ დაეხმარა კაპიტანი ნაკრებში ადაპტაციაში:

თუ გვერდზე გადავდებთ იმას, რაც მან კარიერის განმავლობაში მოიგო, ის მაინც მსოფლიოში საუკეთესოა. მასთან ერთად გასახდელის გაზიარებამ დამანახა, რომ ისეთი თავმდაბალია, როგორიც ცოტა თუა დარჩენილი. ის ჩემი კერპი ბავშვობიდან იყო.. ვხედავდი, როგორ იტანჯებოდა, შემდეგ კი ყველაფერი მოიგო. მისი გაცილება საფეხბურთო სამყაროდან მართლაც გამორჩეული იქნება

ყოფილმა ტოტენჰემელმა დაჯილდოების ამჟამინდელი კრიტერიუმებიც გააკრიტიკა:

როცა მესი წავა, მერე ვნახავთ, ვის მისცემენ ოქროს ბურთს. ალბათ იმას, ვისაც უკეთესი მარკეტინგი ექნება, რადგან ახლა ყველაფერი ამაზეა დამოკიდებული

აღსანიშნავია, რომ მსგავსი პოზიცია ცოტა ხნის წინ ატლეტიკოს მთავარმა მწვრთნელმა, დიეგო სიმეონემაც დააფიქსირა და განაცხადა, რომ ჯილდოს უდავო ფავორიტი სწორედ მისი თანამემამულეა.

შეგახსენებთ, რომ 39 წლის მესი ოქროს ბურთის 30-კაციან ნომინანტთა სიაშია. ინტერ მაიამის რიგებში ჩატარებული გამორჩეული სეზონისა (45 გოლი, 30 ასისტი) და მსოფლიო ჩემპიონატის ფინალში თამაშის შემდეგ, არგენტინელს შანსი აქვს, თავისივე ისტორიული რეკორდი კიდევ ერთხელ გააუმჯობესოს. გამარჯვებულის ვინაობა 26 ოქტომბერს, ლონდონში დაგეგმილ ცერემონიაზე გაირკვევა.