სავინიო თუ სავიო? - რატომ შეიცვალა ბრაზილიელმა სახელი

ტოტენჰემმა ბრაზილიელი შემტევი დაახლოებით 100 მილიონ ევროდ შეიძინა.

ფეხბურთელმა ლონდონურ კლუბთან კონტრაქტი გააფორმა და ახალ გუნდში 17-ნომრიანი მაისურით ითამაშებს.

ტრანსფერთან ერთად საინტერესო დეტალია ისიც, რომ ბრაზილიელმა სახელი შეიცვალა. მანჩესტერ სიტიში თამაშისას მას მაისურზე სავინიო (Savinho) ეწერა, თუმცა ტოტენჰემში გადასვლის შემდეგ ის თავის ნამდვილ სახელს დაუბრუნდა და მაისურზე კვლავ სავიო (Savio) ეწერება.

როგორც თავად ფეხბურთელი განმარტავს, სავინიო მას ბრაზილიის ნაკრებში პირველივე გამოძახებისას უწოდეს.

მან აღნიშნა:

ჟირონაში ყველა სავინიოთი მიცნობდა, უბრალოდ მაისურზე სავიო მეწერა და სიტიში გადასვლისას გადავწყვიტე სავინიო ამერჩია.

საინტერესოა, რომ კარიერის საუკეთესო სეზონში (2023-24 წლები ჟირონაში, როცა 11 გოლი გაიტანა და 10 საგოლე გადაცემა მიითვალა) მას მაისურზე სავიო ეწერა. ტოტენჰემის გულშემატკივრები იმედოვნებენ, რომ ეს სახელი მისთვის კვლავ წარმატების მომტანი იქნება.