სერხიო რამოსი კონტრაქტის ამოწურვის შედეგად მექსიკურ მონტერეის დატოვებს.
როგორც გამოცემა AS-ი El Chiringuito-ზე დაყრდნობით წერს, ესპანელ მცველს მექსიკური კლუბის დატოვება აქვს გადაწყვეტილი, თუმცა კარიერას არ დაასრულებს. მას ესპანეთში ან ევროპის რომელიმე სხვა ქვეყნის კლუბში სურს გადასვლა - იმ პირობით, რომ სასურველ შემოთავაზებას მიიღებს.
რამოსის ამ გადაწყვეტილებაზე ორმა ფაქტორმა იქონია გავლენა: პირველი - მისი ოჯახი გაცილებით უკეთ გრძნობს თავს პირენეს ნახევარკუნძულზე, ვიდრე მექსიკაში, ხოლო მეორე - ესპანეთის ნაკრებთან ერთად მსოფლიო ჩემპიონატზე თამაშია.
39 წლის ფეხბურთელს მიაჩნია, რომ ევროპის რომელიმე ჩემპიონატში რეგულარული სათამაშო პრაქტიკის დახმარებით, შეძლებს ესპანეთის ნაკრების მთავარი მწვრთნელის, ლუის დე ლა ფუენტეს დაყოლიებას მის დაბრუნებაზე.
უკანასკნელად რამოსმა ნაკრების მაისურით 2021 წელს ითამაშა.
