შედარება ისტორიულ ბრძოლასთან - რა თქვა იბერიას პრეზიდენტმა მატჩის შემდეგ?

ლარნესთან ორმატჩიან დუელში გამარჯვების შემდეგ, იბერია 1999-ის პრეზიდენტმა, ტარიელ ხეჩიკაშვილმა კომენტარი გააკეთა.

"მადლობა უფალს, რომ ამდენი წლის შრომა დაგვიფასდა. მინდა, ყველას მადლობა გადავუხადო, ვინც დაარსებიდან დღემდე ამ წარმატებაში უმცირესი წვლილი მაინც შეიტანა. ცხადია, მადლობა და მილოცვა ჩვენს სამწვრთნელო შტაბსა და ფეხბურთელებს.

მადლობა ჩვენს საყვარელ გულშემატკივრებს, რომლებიც გამორჩეულები, ობიექტურები და სამართლიანად მომთხოვნები არიან. უბედნიერესი ადამიანი ვარ, რომ მათ ეს სიხარული მივანიჭეთ, ამისთვის ამდენი წლის შრომა და წვალება ნამდვილად ღირდა.

დღეს შინდისელი გმირების ხსენების დღეა, ხვალ კი - დიდგორობა. ჩვენი დიდგორობა მოედანზე გვქონდა და ამ ბრძოლაში გამარჯვებულები ვართ. უფლება არ გვქონდა, რომ ამ დღეს სხვა შედეგისთვის მიგვეღწია.

ღვთის შეწევნითა და ერთობით, იმედია, მომავალშიც არაერთხელ შევძლებთ, რომ ქართველი გულშემატკივარი გავახაროთ", - განაცხადა ხეჩიკაშვილმა.

ტარიელ ხეჩიკაშვილი იბერია 1999-ის ერთ-ერთი დამფუძნებელია და კლუბს დაარსების დღიდან ხელმძღვანელობს.

იბერია, საბურთალოს სახელით, უმაღლეს დივიზიონში პირველად 2015 წელს აღზევდა, 2018, 2024 და 2025 წლებში საქართველოს ჩემპიონი გახდა, 3-ჯერ საქართველოს თასი მოიგო, ხოლო ერთხელ - საქართველოს სუპერ თასი. 2026 წელს კი გახდა ისტორიაში მეორე ქართული კლუბი, რომელიც ევროტურნირის მთავარ ეტაპზე ითამაშებს.

რა თანხა გაინაღდა იბერია 1999-მა ევროტურნირზე მოხვედრით?