შეთანხმება შედგა - დიასი ბაიერნის ძვირადღირებული შენაძენების სამეულში შედის

ფაბრიციო რომანოს ინფორმაციით, ბაიერნმა ლივერპულთან ლუის დიასის ტრანსფერთან დაკავშირებით სრულ შეთანხმებას მიაღწია.

მხარეები 75 მილიონ ევროზე შეთანხმდნენ, სამედიცინო შემოწმების გავლის შემდეგ მოთამაშე ოფიციალურად გახდება ბაიერნის წევრი.

ლუჩოს ლივერპულის დატოვება სურდა, მერსისაიდელები შეთავაზებულ პირობებს დათანხმდნენ და დიასი მიუნხენურ კლუბთან 4-წლიან კონტრაქტს გააფორმებს.

ლუის დიასი ბაიერნის ისტორიაში მე-3 ყველაზე ძვირადღირებული ტრანსფერი ხდება. გერმანულმა კლუბმა ჰარი კეინში 95 მილიონი ევრო გადაიხადა, ლუკა ერნანდესში კი - 80.

ასევე კოლუმბიელი ლივერპულის ისტორიაშიც მე-3 ყველაზე ძვირადღირებული გასხვისება იქნება. მერსისაიდელებმა ფილიპე კოუტინიოს სანაცვლოდ 135 მილიონი ევრო მიიღეს, ლუის სუარესის სანაცვლოდ კი - 81.

კოლუმბიელმა შემტევმა პრემიერ ლიგის გასულ სეზონში 13 გოლი და 5 საგოლე გადაცემა მიითვალა.