2026 წლის მსოფლიო ჩემპიონატის შესარჩევ ციკლში წარუმატებელი სტარტის შემდეგ, შვედეთმა თანამდებობიდან მთავარი მწვრთნელი იონ დალ ტომასონი გაათავისუფლა.
ისინი B ჯგუფის ოთხ თამაშში ერთი ქულით ბოლო ადგილზე არიან, მას შემდეგ რაც ორშაბათს 1:0 წააგეს კოსოვოსთან. შვედეთმა, რომლის შემტევ ხაზშიც არიან ალექსანდერ ისაკი და ვიქტორ გიოკერეში, ჯგუფის პირველ სამ შეხვედრაში სლოვენიასთან ფრე ითამაშა, კოსოვოსთან და შვეიცარიასთან კი წააგო.
ტომასონი გახდა შვედეთის პირველი უცხოელი მწვრთნელი, როცა დანიელი გუნდს 2024 წლის თებერვალში ჩაუდგა სათავეში.
„გადაწყვეტილება მიღებულია იმის გამო, რომ კაცთა ეროვნული ნაკრები ვერ აჩვენებს იმ შედეგებს, რასაც ველოდით, ჯერ კიდევ არსებობს შანსი მარტის ფლეი-ოფში გასასვლელად და ჩვენი პასუხისმგებლობაა, შევქმნათ რაც შეიძლება ოპტიმალური პირობები მსოფლიო ჩემპიონატის ფლეი-ოფში მონაწილეობის მისაღწევად.
ამ კონტექსტში ჩვენ ვაფასებთ, რომ საჭიროა ახალი ხელმძღვანელობა ახალი მწვრთნელის სახით.“ - ნათქვამია შვედეთის საფეხბურთო ასოციაციის თავმჯდომარე სიმონ ასტრიომის განცხადებაში.
შვედეთი შემდეგ ტურში შვეიცარიაში გაემგზავრება და შემდეგ შინ სლოვენიას უმასპინძლებს, რათა სცადოს მეორე ადგილზე მყოფ კოსოვოს, რომელსაც 7 ქულა აქვს, გაუთანაბრდეს.
თუმცა, მათ მაინც შეუძლიათ ფლეი-ოფში გასვლა, თუნდაც ჯგუფში პირველ ორ ადგილს გარეთ დარჩნენ, 2024-25 წლების ერთა ლიგაში მიღწეული წარმატების გამო, სადაც საკუთარი ჯგუფი მოიგეს.
მსოფლიო ჩემპიონატის შესარჩევი ჯგუფების გამარჯვებულები შეავსებენ ევროპის 16-დან 12 ადგილს მომავალი ზაფხულის ტურნირისთვის, ხოლო ჯგუფების მეორე ადგილოსნები ფლეი-ოფში გავლენ.
მათ შეუერთდებიან ერთა ლიგის ჯგუფების ოთხი საუკეთესო გამარჯვებული, რომლებიც შესარჩევში პირველ ორ ადგილს მიღმა დარჩებიან.
