სიტყვიერი შეთანხმება მიღწეულია — ზიდანი საფრანგეთის ნაკრებს ჩაიბარებს!

საფეხბურთო სამყაროს ერთ-ერთი ყველაზე ხანგრძლივი საგა, როგორც ჩანს, დასასრულს უახლოვდება.

ფაბრიციო რომანოს ინფორმაციით, ზინედინ ზიდანსა და საფრანგეთის ფეხბურთის ფედერაციას შორის პრინციპული შეთანხმება უკვე მიღწეულია — ზიზუ ეროვნულ გუნდს სათავეში 2026 წლის მსოფლიო ჩემპიონატის დასრულებისთანავე ჩაუდგება.

მიუხედავად იმისა, რომ დიდიე დეშამმა საფრანგეთის ნაკრებთან ერთად ისტორიული შედეგები დადო, მათ შორის 2018 წლის მსოფლიო ჩემპიონობა, ბოლო პერიოდში სულ უფრო ხშირად ისმოდა კრიტიკა გუნდის ზედმეტად პრაგმატული სათამაშო სტილის გამო. 2026 წლის მუნდიალი დეშამისთვის მე-14 წელი იქნება ნაკრების სათავეში და მან წინასწარ გამოაცხადა, რომ ამ სანაკრებო ტურნირის შემდეგ გუნდს ოფიციალურად დატოვებს.

ზიდანის უკანასკნელი სამუშაო ადგილი მადრიდის რეალი იყო, რომელიც მან მეორედ, 2021 წელს დატოვა და მას შემდეგ მწვრთნელად აღარ უმუშავია.