აფრიკის თასის ფინალის შემდეგ, ბრაჰიმ დიასმა განცხადება გამოაქვეყნა.
რეალის შემტევს მატჩის ბოლო წამებზე თავისი ნაკრებისთვის 50 წლის შემდეგ პირველი ტიტულის მოტანა შეეძლო, თუმცა ფეხბურთელმა პენალტი ცუდად შეასრულა და მეკარეს ვერ აჯობა. ექსტრა-ტაიმში სენეგალმა ერთადერთი გოლი შეაგდო და თასსაც დაეუფლა.
„სული მტკივა. ამ ტიტულზე ვოცნებობდი მთელი იმ სიყვარულის წყალობით, რომელიც თქვენგან მივიღე — თითოეული შეტყობინება, მხარდაჭერის ყოველი ჟესტი მაფიქრებინებდა, რომ მარტო არ ვიყავი. ბოლომდე ვიბრძოლე, რაც შემეძლო ყველაფერი დავდე, პირველ რიგში — გული.
გუშინ დავმარცხდი და სრულ პასუხისმგებლობას საკუთარ თავზე ვიღებ. მთელი გულით გიხდით ბოდიშს.
გამოჯანმრთელება გამიჭირდება, რადგან ეს ჭრილობა იოლად არ ხორცდება… მაგრამ ვეცდები. არა საკუთარი თავისთვის, არამედ ყველასთვის, ვინც მენდო და ყველასთვის, ვინც ჩემთან ერთად განიცადა ეს ტკივილი.
გავაგრძელებ გზას წინ, სანამ ერთ დღეს არ შევძლებ, ეს სიყვარული დაგიბრუნოთ და ჩემი მაროკოელი ხალხისთვის საამაყო ადამიანი გავხდე." — წერს სოციალურ ქსელში ფეხბურთელი.
