საქართველოს ეროვნული ნაკრების მთავარმა მწვრთნელმა, რამაზ სვანაძემ უნგრეთთან მატჩის წინ გამართულ პრესკონფერენციაზე გუნდის მენტალურ მდგომარეობასა და არსებულ გამოწვევებზე ისაუბრა.
მწვრთნელის განცხადებით, ბოლო პერიოდის წარუმატებლობები მხოლოდ ფსიქოლოგიური ფაქტორით არ არის განპირობებული და ფეხბურთში მსგავსი რთული პერიოდები ბუნებრივია:
რაც შეეხება მენტალურ მხარეს, მერწმუნეთ, ამ მხრივ საუბარი ბევრი გვქონდა, ბიჭებმაც ისაუბრეს ერთმანეთში. ის, რომ ვერ გავიმარჯვეთ, არ ვთვლი, რომ მხოლოდ მენტალური მხარის ბრალი იყო ან ვინმე რამეს აკლებდა. ფეხბურთში ბევრი ასეთი მომენტია. ნებისმიერი კლუბი ან ნაკრები ასეა. ფეხბურთში დაღმართს აღმართი მოსდევს. არავის არ მოსწონს, ჩვენც არ მოგვწონს, ყველა ცდილობს თავიდან აირიდოს ეს, მაგრამ არ უნდა დაგვავიწყდეს, რომ ფეხბურთში არსებობს გამარჯვება და არსებობს წაგება.
სვანაძემ ხაზი გაუსვა, რომ გუნდი რთულ გასავლელ გზაზე იმყოფება, თუმცა მთელი შემადგენლობა მზად არის, რომ ხვალინდელი შეხვედრიდანვე დაიწყოს სიტუაციის გამოსწორება:
ფეხბურთში არსებობს გზა, რომელიც რთულდება და ჩვენ ძალიან რთულ გზას გავდივართ. იმედი მაქვს, რომ ჩვენი შემართებით, ჩვენი საუბრებით, მენტალური თუ ტაქტიკური მხარე იქნება, ამ ყველაფერს დავალაგებთ და ამის დალაგებას დავიწყებთ ხვალ, ასეა განწყობილი მთელი გუნდი.
