ჩრდილოეთ ირლანდიის ნაკრების მთავარმა მწვრთნელმა, მაიკლ ო'ნილმა საქართველოსთან შეხვედრამდე პრესკონფერენციაზე შეფასებები გააკეთა.
"მეკარისა და მცველების მონდომებითა და დისციპლინით აღფრთოვანებული ვარ, რადგან ზუსტად ისე თამაშობენ, როგორც ვავალებთ და გვინდა. როგორც ჩანს, რთულად გასატეხი გუნდი ვართ და მეტოქეებს ჩვენს კარში გოლის გატანა უჭირთ.
ვფიქრობ, გუნდის სისწრაფე, ერთიანობა და საჭირო დროს თითოეული ფეხბურთელის მობილიზება, რომ დაცვით სამუშაოებში ჩაერთოს, ძალიან გვეხმარება და შედეგიც მოაქვს.
საქართველოს საკუთარ მოედანზე ვხვდებით და როცა შინ თამაშობ, შენზეა დამოკიდებული რამდენად დომინანტური იქნები. თბილისშიც ვგრძნობდით, რომ თამაშის დიდ ნაწილს ვაკონტროლებდით, თუმცა მეტოქემ მეორე ტაიმში მოუმატა, მაგრამ ჯამში ჩვენ, შესაძლოა, უკეთესი საგოლე შანსები გვქონდა. მათთვის დანიშნული პენალტი საკამათო იყო, ჩვენ კი არ დაგვინიშნეს, არადა, ამის საფუძველი ნამდვილად არსებობდა. საბოლოოდ, მოვიგეთ თანაბარი მატჩი, რომელშიც გამარჯვება ორივე გუნდს შეეძლო. ალბათ, ამჯერადაც ძალიან დაძაბული თამაში გამოვა.
საკუთარ სტადიონზე გამოსვლას მოუთმენლად ველოდებით და ძალიან გვიხარია, რომ არსებობს მოლოდინებიც", - აღნიშნა 57 წლის ო'ნილმა.
გამოცდილი სპეციალისტი ჩრდილოეთ ირლანდიის ნაკრებს 2022 წლიდან წვრთნის - 15 მოგება, 6 ფრე, 16 წაგება. მიმდინარე ერთა ლიგაზე მის გუნდს ჯერ გოლი არ გაუშვია და ჯგუფს 3-ქულიანი უპირატესობით ლიდერობს.
ჩრდილოეთ ირლანდიისა და საქართველოს ნაკრებთა შეხვედრა 5 ოქტომბერს, ჩვენი დროით 22:45 საათიდან დაიწყება. პირდაპირი რეპორტაჟი პირველ არხზეა.
სვანაძემ დაასახელა მიზეზი, რის გამოც ნაკრებს გოლი ვერ გააქვს
